Fornminjasjóður styrkir rannsóknir á hvalveiðistöðvum

Fornminjasjóður veitti nýlega styrk til verkefnisins „Hvalveiðar Norðmanna á Vestfjörðum á 19. öld”. Verkefnið er hluti af rannsóknum Ragnars Edvardssonar á umfangi og eðli hvalveiða erlendra manna við Vestfirði. Sérstök áhersla er á að kanna áhrif hvalveiðimannanna á íslenskt samfélag og hvaða ástæður liggja að baki því að Íslendingar hófu ekki hvalveiðar í atvinnuskyni strax á 17. öld þar sem að lýsi var eftirsótt ljósmeti og hefði getað verið mikilvæg viðbót við íslenskan efnahag.

 

Íslendingar stunduðu ekki hvalveiðar að neinu marki fyrr en komið var fram á 20. öld en við upphaf 17. aldar komu erlendir hvalveiðimenn til landsins, þá aðallega Hollendingar og Baskar. Hvalveiðimenn reistu landstöðvar á Ströndum og stunduðu þaðan hvalveiðar í atvinnuskyni fram til loka 17. aldar. Hvalveiðar í atvinnuskyni á Íslandi lögðust af um 1700 en hófust aftur á seinni hluta 19. aldar með tilkomu norskra hvalveiðimanna sem reistu hvalveiðistöðvar á Vest- og Austfjörðum og stunduðu hvalveiðar fram til 1913.

 

Styrkurinn úr Fornminjasjóði verður nýttur til að kortleggja minjar við norskar hvalveiðistöðvar bæði á landi og neðansjávar.

 

Myndin er af norskri hvalveiðistöði  fengin frá Skjalasafni Ísafjarðar. 

Þú ert að nota: brimir.rhi.hi.is