Austurland

Jón Jónsson ráðinn verkefnisstjóri við Rannsóknasetur HÍ á Ströndum - Þjóðfræðistofu

Jón Jónsson þjóðfræðingur hefur verið ráðinn verkefnisstjóri Rannsóknaseturs Háskóla Íslands á Ströndum – Þjóðfræðistofu. Starfið var auglýst í júli sl. og bárust þrjár umsóknir. Jón er með meistarapróf í þjóðfræði frá Háskóla Íslands. Áður en hann kom til starfa við rannsóknasetrið starfaði hann sem menningarfulltrúi Vestfjarða í tæpan áratug. Þar áður rak Jón rekið eigið fyrirtæki á sviði miðlunar sögu og þjóðfræða. Jón hefur stundið margvíslegar rannsóknir í þjóðfræði og nýverið gaf Háskólaútgáfan út bók hans Á mörkum mennskunnar. Viðhorf til förufólks í sögnum og samfélagi.

Jón hefur gegnt tímabundnu starfi við rannsóknasetrið síðustu tvö árin eða frá því að setrinu var komið á fót haustið 2016. Sæunn Stefánsdóttir, forstöðumaður Stofnunar rannsóknasetra Háskóla Ísland, segir að með ráðningunni sé starfið orðið ótímabundið og þannig mikilvægt skref tekið til að festa starfsemi Rannsóknaseturs HÍ á Ströndum – Þjóðfræðistofu enn betur í sessi.

Með samningi mennta- og menningarmálaráðuneytisins og Stofnunar rannsóknasetra Háskóla Íslands í ársbyrjun 2016 var sett af stað vinna við að greina tækifæri og leiðir við að koma rannsóknasetrinu á fót, en áður hafði Strandagaldur staðið fyrir rekstri Þjóðfræðistofu á Hólmavík. Á grunni þessarar vinnu varð úr að ráðuneytið fól Stofnun rannsóknasetra Háskóla Íslands að hefja starfsemi rannsóknaseturs í þjóðfræði á Ströndum, í náinni samvinnu við heimamenn. Að hluta til er byggt á þeim góða grunni sem áður hafði verið lagður með starfsemi Þjóðfræðistofu Strandagaldurs. Aðsetur rannsóknasetursins er í Þróunarsetrinu á Hólmavík.

Rannsóknasetur Háskóla Íslands á Ströndum – Þjóðfræðistofa er eitt af níu rannsóknasetrum Háskóla Íslands um landið. Viðfangsefni þeirra eru fjölbreytt, en á meðal þeirra eru lífríki hafsins, umhverfi og landnýting, hvalir, fiskar og fuglar, ferðamál, bókmenntir, sagnfræði, fornleifafræði og þjóðfræði.

Markmið Stofnunar rannsóknasetra Háskóla Íslands er m.a. að stuðla að rannsóknum, menntun og leiðbeiningu framhaldsnema víða um land og vera vettvangur samstarfsverkefna háskólans við nærumhverfi og nærsamfélög setranna. Með þeim hætti leggja rannsóknasetrin sitt af mörkum við að efla tengsl Háskóla Íslands við atvinnu- og þjóðlíf. Stofnun rannsóknasetra Háskóla Íslands býður Jón Jónsson hjartanlega velkominn til starfa.

Auglýst eftir verkefnisstjóra við Rannsóknasetur HÍ á Snæfellsnesi

Stofnun rannsóknasetra Háskóla Íslands auglýsir laust til umsóknar starf verkefnisstjóra við Rannsóknasetur Háskóla Íslands á Snæfellsnesi, sem staðsett er í Stykkishólmi.
 
Rannsóknasetur Háskóla Íslands á Snæfellsnesi sinnir rannsóknum á sjófuglum á Breiðafirði, einkum æðarfugli. Rannsóknasetrið hefur aðsetur í Ráðhúsi Stykkishólms. Verkefnisstjórinn mun hafa umsjón með langtímarannsóknum setursins á fuglastofnum. Í því felst m.a. fjölbreytt gagnaöflun á vettvangi, umsjón gagnagrunna, úrvinnsla og kynning á niðurstöðum í ræðu og riti. Verkefnisstjórinn mun einnig koma að öðrum verkefnum rannsóknasetursins og taka þátt í greinaskrifum og styrkumsóknum. Þá verður verkefnisstjórinn þátttakandi í sérhæfðu rannsóknateymi ásamt forstöðumanni og samstarfsmönnum.
 
Innan Stofnunar rannsóknasetra Háskóla Íslands eru níu sjálfstæð rannsóknasetur víða um land. Markmið stofnunarinnar er m.a. að skapa aðstöðu til rannsókna á landsbyggðinni og vera vettvangur samstarfsverkefna háskólans við sveitarfélög, stofnanir, fyrirtæki, félagasamtök og einstaklinga á landsbyggðinni.
 
Hæfniskröfur:
  • Háskólapróf í líffræði eða vistfræði, meistarapróf er kostur.
  • Reynsla í öflun vistfræðilegra gagna og umsjón gagnasafna.
  • Frumkvæði og sjálfstæði í vinnubrögðum, lipurð í mannlegum samskiptum.
  • Gott vald á ensku og íslensku.
  • Góður grunnur í tölfræði er æskilegur.
  • Reynsla af stofnrannsóknum á fuglum, fuglamerkingum eða annarri rannsóknavinnu utan dyra er æskileg.
  • Reynsla af alþjóðasamstarfi, af þverfræðilegu samstarfi og sókn í rannsóknasjóði er kostur.
Verkefnisstjórinn verður starfsmaður Háskóla Íslands en hefur starfsaðstöðu við Rannsóknasetur Háskóla Íslands á Snæfellsnesi. Búseta á svæðinu er skilyrði. Um fullt starf er að ræða.
 

Umsóknarferli

Umsóknarfrestur er til 27. ágúst 2018.
Æskilegt er að viðkomandi geti hafið störf sem fyrst.
Sótt er um starfið á vefsíðu Háskóla Íslands undir laus störf.
 
Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknafrests.
 
Laun eru samkvæmt kjarasamningi fjármálaráðherra og Félags háskólakennara.
 
Allar nánari upplýsingar um starfið veitir Jón Einar Jónsson, forstöðumaður Rannsóknaseturs Háskóla Íslands á Snæfellsnesi í síma 8472436 og joneinar@hi.is.
 
Við ráðningu í störf í Háskóla Íslands er tekið mið af jafnréttisáætlun skólans.
 
Vakin er athygli á málstefnu Háskóla Íslands.

Rannsóknasetur Háskóla Íslands á Austurlandi sett aftur á fót og Unnur Birna Karlsdóttir ráðin forstöðumaður

Rannsóknasetur Háskóla Íslands á Austurlandi hefur tekið starfa á ný með ráðningu Unnar Birnu Karlsdóttur í starf forstöðumanns. Starfið var auglýst í lok mars sl. og ákveðið að ráða Unni Birnu að loknu dómnefndar- og valnefndarferli. Með ráðningu forstöðumanns Rannsóknaseturs HÍ á Austurlandi er stigið afar mikilvægt skref í þróun starfsemi rannsóknasetra Háskóla Íslands um land allt.

Að sögn Sæunnar Stefánsdóttur, forstöðumanns Stofnunar rannsóknasetra Háskóla Íslands, er um að ræða fyrsta skrefið til eflingar starfs rannsóknasetursins á Austurlandi. Þegar sé verið að leggja drög að metnaðarfullum rannsóknaverkefnum og fjármögnun þeirra til að efla starfsemina og draga fleira fólk og nemendur inn í starfið.

Rannsóknasetur Háskóla Íslands var fyrst sett á fót 2008. Hlé var gert á reglulegri starfsemi síðla árs 2010 vegna aðhaldsaðgerða HÍ  í kjölfar kreppunnar en Stofnun rannsóknasetra hélt úti rannsóknum m.a. á svæðisbundinni fjölmiðlun ásamt fleiri smærri rannsóknaverkefnum sem unnin voru á svæðinu ásamt því að veita stuðning til að hægt væri að auka tímabundið þjónustu við nemendur í fjarnámi við HÍ. Frá árinu 2015 hefur verið starfsemi á vegum Stofnunar rannsóknasetra Háskóla Íslands á Austurlandi með rannsóknaverkefninu „Maður og náttúra“ þar sem hreindýrið og þýðing þess í íslenskri náttúrusýn og menningu er viðfangsefnið. Afrakstri verkefnisins verður m.a. gerð skil í bók sem Sögufélagið mun gefa út á næsta ári.

Starfsstöð Rannsóknaseturs Háskóla Íslands á Austurlandi er á Egilsstöðum og hefur sveitarfélagið Fljótsdalshérað styrkt starfsemi þess með mikilvægu framlagi.

„Við erum mjög glöð með að rannsóknasetrið hefur tekið til starfa á ný á Egilsstöðum“, segir Björn Ingimarsson, bæjarstjóri Fljótsdalshéraðs, „og við hlökkum til að sjá það vaxa og dafna, fræðastarfi og samfélaginu öllu til heilla. Við óskum Unni Birnu einnig til hamingju með ráðninguna.“

Eins og áður sagði hefur Unnur Birna Karlsdóttir verið ráðin forstöðumaður setursins og tekur hún við starfinu 1. júní nk. Unnur Birna lauk doktorsprófi í sagnfræði frá Háskóla Íslands 2010 en áður hafði hún lokið MA- og BA-prófi í sagnfræði og námi í kennslu- og uppeldisfræði frá Háskóla Íslands. Í doktorsritgerð sinni Þar sem fossarnir falla. Náttúrusýn og nýting fallvatna á Íslandi 1900 – 2008 fjallaði hún um sambands manns og náttúru út frá sjónarhóli og aðferðafræði umhverfissagnfræði. Eftir Unni Birnu liggja þónokkrar fræðigreinar og bókarkaflar og þá hefur hún flutt fjölmarga fyrirlestra um umhverfismál og umhverfissagnfræði. Þá hefur Unnur Birna komið að kennslu við Háskóla Íslands og Háskólann á Bifröst.

Unnur Birna hefur frá 2015 verið sérfræðingur við starfsstöð Stofnunar rannsóknasetra Háskóla Íslands  á Egilsstöðum. Áður gegndi Unnur Birna starfi forstöðumanns Minjasafn Austurlands frá 2012. Unnur Birna hefur tekið virkan þátt í félagsstarfi sagnfræðinga og safnamanna.

Markmið Stofnunar rannsóknasetra Háskóla Íslands er m.a. að stuðla að rannsóknum, menntun og leiðbeiningu framhaldsnema víða um land og vera vettvangur samstarfsverkefna háskólans við nærumhverfi og nærsamfélög setranna. Með þeim hætti leggja rannsóknasetrin af mörkum við að efla tengsl Háskóla Íslands við atvinnu- og þjóðlíf. Stofnun rannsóknasetra Háskóla Íslands býður Unni Birnu hjartanlega velkomna til starfa.

Með öræfin í bakgarðinum - Ráðstefna um tengsl samfélags og hálendis á Austurlandi

Dagana 24. – 25. maí 2018 verður haldin ráðstefna á Egilsstöðum á Fljótsdalshéraði undir yfirskriftinni "Með öræfin í bakgarðinum. Um tengsl hálendis og samfélags á Austurlandi." Fyrir ráðstefnunni stendur Stofnun rannsóknasetra Háskóla Íslands á Austurlandi í samvinnu við Söguslóðir Austurlands, Náttúrustofu Austurlands, Minjasafn Austurlands, Vatnajökulsþjóðgarð/Snæfellsstofu og Óbyggðasetur Íslands. Á ráðstefnunni flytja vísindamenn á sviði ýmissa fræðigreina erindi auk þess sem heimamenn leggja sitt af mörkum um sögu byggðar og öræfa fyrr og nú. 

Ráðstefnan er öllum opin og ekkert ráðstefnugjald en gestir kosta sjálfir sína gistingu og málsverði eftir eigin hentugleikum og hafa úr að velja ýmsa staði á Egilsstöðum til að kaupa sér veitingar af fjölbreyttu tagi. Ef fólk gerir sér ferð austur af þessu tilefni er ráðlegt að panta gistingu sem fyrst, og flug ef ferðast er flugleiðis. Nánari upplýsingar veitir Unnur B. Karlsdóttir: unnurk@hi.is og sími 8919979.

* Upp á skipulag ráðstefnudagskrár eru gestir beðnir um að skrá sig. Frestur til skráningar er til 18. maí. Vinsamlega skráið þátttöku hér

Sjá nánar um þátttakendur og efni fyrirlestra í ráðstefnubæklingi hér.

Dagskrá

Fimmtudagur 24. maí

Hótel Hérað - fundarsalur á jarðhæð.

9:15: Mæting og afhending ráðstefnugagna.

9:30-9:40: Setning: Björn Ingimarsson bæjarstjóri.

9:40-10:20: Unnur Birna Karlsdóttir: Hreppsveiðar og sportveiðar á hreindýrum 1954-1972.

10:20-11:00: Skarphéðinn G. Þórisson: Heiðagæsir og hreindýr á hásléttu Austurlands.

11:00-11:40: Guðrún Óskarsdóttir: Gróður á hásléttu Austurlands.

11:40-13:00: Hádegishlé.

13:00-13:40: Esther Ruth Guðmundsdóttir: Hvaða upplýsingar geymir Lögurinn um eldvirkni á Íslandi?
13:40-14:20: Elsa Guðný Björgvinsdóttir: „Allt dauðlegt hlítur að deyja“ - Upplifun fólks af öskufallinu 1875.
14:20-15:00: Snorri Baldursson: Vatnajökulsþjóðgarður á heimsminjaskrá UNESCO.

15:00-15:20: Kaffihlé.

15:20-15:50: Baldur Pálsson: Lesnir valdir kaflar úr endurminningum heiðarbúa.
15:50-16.20: Hjördís Hilmarsdóttir í samstarfi við HS Tókatækni o.fl.: Heiðarbýlin - 100 ára byggðasaga. Einnig kynntur bæklingur um heiðarbýlin, vegvísar í heiðinni og hvernig hægt er að nálgast upplýsingar um heiðarbýlin og ábúendur þeirra á heimasíðu Ferðafélags Fljótsdalshéraðs.
16:20-16:30: Umræður

Hlé.

17:00:-18:30: Móttaka í Minjasafni Austurlands í Safnahúsinu á Egilsstöðum. Ráðstefnugestum stendur til boða að skoða sýninguna „Hreindýrin á Austurlandi“ og aðrar sýningar í húsinu, í boði léttar veitingar.

 

Föstudagur 25. maí

Hótel Hérað - fundarsalur á jarðhæð.

9:20-10:00: Ívar Örn Benediktsson: Er nútíðin lykillinn að fortíðinni? Um landmótun jökla á öræfum og forna ísstrauma Norðaustur- og Austurlands.

10:00-10:40: Hreggviður Norðdahl: Myndun og saga Lagarins í kjölfar hörfunar jökla af Úthéraði og úr Fljótsdal fyrir um 12.000 árum síðan.

10:40-11:20: Steinunn Kristjánsdóttir: Úr Fljótsdal og suður á land.

 

11:30-18:00: Boðið í söguferð. Fararstjórn og leiðsögumaður Baldur Pálsson frá Aðalbóli í Hrafnkelsdal.  

11:30: Lagt af stað í rútu frá Hótel Héraði og keyrt inn í Fljótsdal.

12:10-13:00: Hádegisverður í Klausturkaffi. - *Verð per mann greiðir hver fyrir sig á staðnum; 1800 kr. súpa og kaffi, en hægt að panta annað af matseðli. 

13:15-14:00: Heimsókn í Vatnajökulsþjóðgarð/Snæfellsstofu. Móttaka þjóðgarðsvarðar og kynning á starfsemi Vatnajökulsþjóðgarðs og sýning um þjóðgarðinn skoðuð.

14:15-15:45: Heimsókn í Óbyggðasafn Íslands. Móttaka staðarhaldara og kynning á starfsemi safnsins og sýningin skoðuð.

15:45: Skyggnst upp á heiði eftir gangnamönnum, hreindýraþjófum og Hrafnkeli Freysgoða, heiðagæsum og hreindýrum, þ.e. horft yfir söguslóðir og náttúru á Fljótsdalsheiði og á öræfum eins og útsýni gefst. (Varaáætlun ef veður krefst.)

17:30-18:00: Komið aftur í Egilsstaði. Ferðar- og ráðstefnulok.

 

 

 

Auglýst er eftir forstöðumanni Rannsóknaseturs HÍ á Austurlandi

Stofnun rannsóknasetra Háskóla Íslands auglýsir til umsóknar starf forstöðumanns Rannsóknaseturs Háskóla Íslands á Austurlandi, sem jafnframt er starf sérfræðings.

Stofnun Rannsóknasetra Háskóla Íslands hyggst koma að nýju á fót Rannsóknasetri Háskóla Íslands á Austurlandi sem starfaði þar á árunum 2008 til 2010. Frá haustinu 2014 hefur akademískur sérfræðingur á vegum stofnunarinnar haft aðsetur og unnið sínar rannsóknir á Austurlandi.

Rannsóknasetri Háskóla Íslands á Austurlandi er ætlað að sinna rannsóknum á breiðu sviði með áherslu á tengsl manns og náttúru. Auk sjálfstæðra akademískra rannsókna hefur forstöðumaður umsjón með starfsemi setursins, fjármálum þess og daglegum rekstri. Hann skipuleggur rannsóknir og samstarfsverkefni, hefur með höndum áætlanagerð og stýrir sókn í sjóði. Hann þarf að geta tekið að sér leiðbeiningu háskólanema í framhaldsnámi og aðra kennslu á háskólastigi.

Innan Stofnunar rannsóknasetra Háskóla Íslands eru 9 sjálfstæð rannsóknasetur víða um land. Rannsóknir eru meginviðfangsefni rannsóknasetranna, og eru viðfangsefnin fjölbreytt og tengjast nærumhverfi setranna með einhverjum hætti. Lögð er rík áhersla á árangur í starfi, áhrif og gæði rannsókna og hagnýtingu rannsóknaniðurstaðna. Þá er stofnunin jafnframt vettvangur samstarfsverkefna háskólans við sveitarfélög, stofnanir, fyrirtæki, félagasamtök og einstaklinga á landsbyggðinni.

Umsækjendur skulu hafa lokið doktorsprófi á sviði umhverfisfræða, t.d. í umhverfissagnfræði eða skyldum greinum og hafa stundað sjálfstæðar rannsóknir á því sviði. Frumkvæði og sjálfstæði í vinnubrögðum, lipurð í mannlegum samskiptum, gott vald á ensku og íslensku er nauðsyn. Reynsla af alþjóðasamstarfi sem og reynsla af þverfræðilegu samstarfi er æskileg. Þá er reynsla af sókn í innlenda sem erlenda rannsóknasjóði kostur. Umsækjendur skulu leggja fram rannsóknaáætlun til fimm ára þar sem skal koma fram hvernig rannsóknir umsækjanda tengjast Austurlandi.

Forstöðumaðurinn verður starfsmaður Háskóla Íslands en hefur starfsaðstöðu við Rannsóknasetur Háskóla Íslands á Austurlandi. Starfsstöð setursins er á Egilsstöðum og er gert ráð fyrir að forstöðumaðurinn gegni starfi sínu þaðan. Búseta á svæðinu er skilyrði. Um fullt starf er að ræða og verður ráðið í starfið til fimm ára með möguleika á ótímabundinni ráðningu að þeim tíma liðnum, sbr. 3. mgr. 31. gr. reglna fyrir Háskóla Íslands nr. 569/2009. Æskilegt er að viðkomandi geti hafið störf sem fyrst.

Um meðferð umsókna, mat á hæfi umsækjenda og ráðningu í starfið er farið eftir ákvæðum laga um Háskóla nr. 85/2008 og reglna um Háskóla Íslands nr. 569/2009. Sérstök nefnd sem rektor skipar annast mat og forgangsröðun umsókna.

Umsóknarfrestur er til 30. apríl 2018.

Sótt er um starfið á vefsíðu Háskóla Íslands undir laus störf.

Umsækjendur skulu láta rannsóknaáætlun til fimm ára fylgja umsókn sinni, vottorð um námsferil sinn og störf, ritaskrá, skýrslu um vísindastörf og önnur störf sem þeir hafa unnið. Í umsókn skal koma fram hver ritverka sinna, allt að átta talsins, umsækjandi telur veigamest með tilliti til þess starfs sem um ræðir. Umsækjandi sendir eingöngu þessi ritverk sín með umsókn, eða vísar til þess hvar þau eru aðgengileg á rafrænu formi. Þegar fleiri en einn höfundur stendur að innsendu ritverki skulu umsækjendur gera grein fyrir framlagi sínu til verksins. Enn fremur er ætlast til þess að umsækjendur láti fylgja með umsagnir um kennslu- og stjórnunarstörf sín, eftir því sem við á. Umsókn og umsóknargögn sem ekki er skilað rafrænt skal skila í tvíriti til Vísinda- og nýsköpunarsviðs Háskóla Íslands, Sæmundargötu 2, 101 Reykjavík.

Allar nánari upplýsingar um starfið veitir Sæunn Stefánsdóttir, forstöðumaður Stofnunar Rannsóknasetra Háskóla Íslands í síma 525 4041, saeunnst@hi.is .

Öllum umsækjendum verður svarað og þeim tilkynnt um ráðstöfun starfsins þegar ákvörðun liggur fyrir. Umsóknir geta gilt í sex mánuði frá lokum umsóknarfrests.

Laun eru samkvæmt kjarasamningi fjármálaráðherra og Félags háskólakennara.

Við ráðningu í störf við Háskóla Íslands er tekið mið af jafnréttisáætlun Háskóla Íslands.

Vakin er athygli á málstefnu Háskóla Íslands.

Tímarit Háskóla Íslands 2018 er komið út

Tímarit Háskóla Íslands 2018 er komið út. Þar er að finna fjölbreyttar greinar um starfsemi háskólans um land allt. Í því má meðal annars vinna viðtal við Jón Jónsson, þjóðfræðing við Rannsóknasetur Háskóla Íslands á Ströndum - Þjóðfræðistofu, um fólk og birni á förum um landið. Þá er einnig rætt við Chörlu Basran, doktorsnema við Rannsóknasetur Háskóla Íslands á Húsavík, um rannsóknaverkefni hennar um hnúfubaka í veiðarfærum. Rannsókn á ferðavenjum og útgjöldum ferðamanna á völdum áfangastöðum um landið er umræðuefnið í viðtali við Lilju Rögnvaldsdóttur, verkefnisstjóra við Rannsóknasetur Háskóla Íslands á Húsavík. Þá er einnig fjallað um í Tímaritinu rannsókn Jukka Siltanen, meistaranema í umhverfis- og auðlindafræði, um efnahagslega leyndardóma Snæfellsjökuls. Þorvarður Árnason, forstöðumaður Rannsóknaseturs Háskóla Íslands á Hornafirði, var einn leiðbeinenda Jukka í verkefninu. 

Í tímaritinu er svo einnig að finna viðtal við Birnu Gunnarsdóttur, verkefnisstjóra við Stofnun rannsóknasetra Háskóla Íslands og á Nýsköpunar- og vísindasviði HÍ, um opin vísindi. 

Sjón er sögu ríkari. Tímaritið má finna hér. 

Áramótakveðja Stofnunar rannsóknasetra Háskóla Íslands

Starfsfólk Stofnunar rannsóknasetra Háskóla Íslands þakkar samfylgdina á árinu sem er að líða og óskar samstarfsfólki sínu gleðilegs nýs árs.

Árið 2018 verður 18. starfsár stofnunarinnar og eins og áður margt spennandi framundan. Ársfundur stofnunarinnar verður t.a.m. haldinn í Bolungarvík, 11. apríl nk. Takið daginn frá!

Auglýst eftir forstöðumanni Rannsóknaseturs Háskóla Íslands á Norðurlandi vestra

Forstöðumaður Rannsóknaseturs-Háskóli Íslands- Norðurland vestra

Stofnun rannsóknasetra Háskóla Íslands auglýsir til umsóknar starf forstöðumanns Rannsóknaseturs Háskóla Íslands á Norðurlandi vestra.

Rannsóknasetur Háskóla Íslands á Norðurlandi vestra sinnir rannsóknum á sviði hugvísinda, einkum sagnfræði. Starfsstöð þess er á Skagaströnd. Auk sjálfstæðra akademískra rannsókna hefur forstöðumaður umsjón með starfsemi setursins, fjármálum þess og daglegum rekstri. Hann skipuleggur rannsóknir og samstarfsverkefni, hefur með höndum áætlanagerð og stýrir sókn í sjóði. Hann þarf að geta tekið að sér leiðbeiningu háskólanema í framhaldsnámi og aðra kennslu á háskólastigi. 

Innan Stofnunar rannsóknasetra Háskóla Íslands eru 8 sjálfstæð rannsóknasetur víða um land. Rannsóknir eru meginviðfangsefni rannsóknasetranna,  og eru viðfangsefnin fjölbreytt og tengjast nærumhverfi setranna með einhverjum hætti. Lögð er rík áhersla á árangur í starfi, áhrif og gæði rannsókna og hagnýtingu rannsóknaniðurstaðna. Þá er stofnunin jafnframt vettvangur samstarfsverkefna háskólans við sveitarfélög, stofnanir, fyrirtæki, félagasamtök og einstaklinga á landsbyggðinni.

Umsækjendur skulu hafa lokið doktorsprófi í sagnfræði eða skyldum greinum og hafa stundað sjálfstæðar rannsóknir á því sviði. Frumkvæði og sjálfstæði í vinnubrögðum, lipurð í mannlegum samskiptum, gott vald á ensku og íslensku er nauðsyn. Reynsla af alþjóðasamstarfi sem og reynsla af þverfræðilegu samstarfi er æskileg. Þá er reynsla af sókn í innlenda sem erlenda rannsóknasjóði kostur. Umsækjendum er skylt að leggja fram rannsóknaáætlun til fimm ára þar sem skal koma fram hvernig rannsóknir umsækjenda tengjast Norðurlandi vestra. 

Forstöðumaðurinn verður starfsmaður Háskóla Íslands en hefur starfsaðstöðu við Rannsóknasetur Háskóla Íslands á Norðurlandi vestra. Starfsstöð setursins er á Skagaströnd og er gert ráð fyrir að forstöðumaðurinn gegni starfi sínu þaðan. Búseta á svæðinu er skilyrði. Um fullt starf er að ræða og verður ráðið í starfið til fimm ára með möguleika á ótímabundinni ráðningu að þeim tíma liðnum, sbr. 3. mgr. 31. gr. reglna fyrir Háskóla Íslands nr. 569/2009. Æskilegt er að viðkomandi geti hafið störf sem fyrst.

Um meðferð umsókna, mat á hæfi umsækjenda og ráðningu í starfið er farið eftir ákvæðum laga um Háskóla nr. 85/2008 og reglna um Háskóla Íslands nr. 569/2009. Sérstök nefnd sem rektor skipar annast mat og forgangsröðun umsókna.

Umsóknarfrestur er til 27. nóvember 2017.

Umsóknir skulu berast á rafrænu formi á netfangið bmz@hi.is merkt HI17100144. Umsækjendur skulu láta rannsóknaáætlun til fimm ára fylgja umsókn sinni, vottorð um námsferil sinn og störf, ritaskrá, skýrslu um vísindastörf og önnur störf sem þeir hafa unnið. Í umsókn skal koma fram hver ritverka sinna, allt að átta talsins, umsækjandi telur veigamest með tilliti til þess starfs sem um ræðir. Umsækjandi sendir eingöngu þessi ritverk sín með umsókn, eða vísar til þess hvar þau eru aðgengileg á rafrænu formi. Þegar fleiri en einn höfundur stendur að innsendu ritverki skulu umsækjendur gera grein fyrir framlagi sínu til verksins. Enn fremur er ætlast til þess að umsækjendur láti fylgja með umsagnir um kennslu- og stjórnunarstörf sín, eftir því sem við á. Umsókn og umsóknargögn sem ekki er skilað rafrænt skal skila í tvíriti til Vísinda- og nýsköpunarsviðs Háskóla Íslands, Sæmundargötu 2, 101 Reykjavík.

Öllum umsækjendum verður svarað og þeim tilkynnt um ráðstöfun starfsins þegar ákvörðun liggur fyrir. Umsóknir geta gilt í sex mánuði frá lokum umsóknarfrests. 

Laun eru samkvæmt kjarasamningi fjármálaráðherra og Félags háskólakennara. 

Við ráðningar í störf hjá Háskóla Íslands er tekið mið af jafnréttisáætlun skólans.

Allar nánari upplýsingar um starfið veitir Sæunn Stefánsdóttir, forstöðumaður Stofnunar Rannsóknasetra Háskóla Íslands í síma 525 4041, saeunnst@hi.is.

Jöklar í bókmenntun, listum og lífinu - ráðstefna á Höfn í Hornafirði

Helgina 28.-30. apríl verður haldin ráðstefna á Höfn í Hornafirði með yfirskriftinni Jöklar í bókmenntum, listum og lífinu. Fyrir ráðstefnunni stendur Rannsóknarsetur Háskóla Íslands á Höfn, í samvinnu við Náttúrustofu Suðausturlands og Menningarmiðstöð Hornafjarðar. Til ráðstefnunnar er boðið rithöfundum og fræðimönnum á sviði bókmennta, myndlistar og jöklafræða. Meðal gesta verða rithöfundarnir Steinunn Sigurðardóttir, Linda Vilhjálmsdóttir og Ófeigur Sigurðsson sem öll hafa fjallað um jökla í skrifum sínum.

Í tengslum við ráðstefnuna verða settar upp sýningar af ýmsu tagi; í Listasafni Svavars Guðnasonar á Höfn verður málverkasýning á verkum í eigu safnsins, auk nokkurra verka sem koma frá Listasafni Íslands. Í Nýheimum verður ljósmynda- og kortasýning, handverkssýning, sýning á teikningum barna, sem og sýning á heimildamyndinni Jöklaland eftir Gunnlaug Þór Pálsson. Ráðstefnan er styrkt af Samtökum sunnlenskra sveitarfélaga (SASS) og Vinum Vatnajökuls.

Allir eru velkomnir að taka þátt: hlýða á fyrirlestra og skoða sýningar. Ef fólk vill gera sér helgarferð austur af þessu tilefni væri ráð að panta gistingu sem fyrst.

Föstudagur 28. apríl:

NÝHEIMAR

16:30   Mæting á ráðstefnuna, ráðstefnugögn afhent.

16:45   Setning ráðstefnunnar: Ávarp bæjarstjóra.

16:50   Karlakórinn Jökull flytur Jökulinn (lag: Jóhann Móravek, ljóð: Guðbjartur Össurarson).

16:55   Kynningar á ljósmyndasýningu og kortasýningu í Nýheimum.

17:00   Opnunarfyrirlestur í Nýheimum: Steinunn Sigurðardóttir: Jökullinn og tíminn: Við upphaf jöklaráðstefnu.

17:40   Opnun málverkasýningar í Listasafni Svavars Guðnasonar og kokteill.

18:15   Sýning á Jöklalandi eftir Gunnlaug Þór Pálsson.

20:15   Kvöldverður á Humarhöfninni.

Laugardagur 29. apríl

NÝHEIMAR

10:00   Fyrirlestur: Oddur Sigurðsson: Þekking Íslendinga á jöklum og eðli þeirra.

10:40   Fyrirlestur: Julian D‘Arcy: Um enska þýðingu og ‚þverfagleika‘ í Jöklabók Helga Björnssonar.

11:10   Kaffi og opnun á handverkssýningu og teikningum barna á bóksafni Menningarmiðstöðvar Hornafjarðar í Nýheimum.

11:30   Fyrirlestur: Kristján Jóhann Jónsson: „Taugarnar þúsundir ísvetra ófu“ (jöklarnir í lundarfari landans).

12:10   Ljóðalestur: Linda Vilhjálmsdóttir rithöfundur les úr Frostfiðrildum (1. hluti).

12:20   Hádegisverður.

13:30   Ljóðalestur: Linda Vilhjálmsdóttir les úr Frostfiðrildum (2. hluti).

13:40   Fyrirlestur: Guðbjörg R. Jóhannesdóttir: VÁ! Upplifun af undrun og ægifegurð andspænis jöklinum.

14:20   Fyrirlestur: Hlynur Helgason:  Jökullinn fangaður í mynd — birtingarmyndir íslenskra jökla í myndlist í ljósi kenninga breska gagnrýnandans Johns Ruskin.

15:00   Kaffi og meðlæti.

15:20   Ljóðalestur: Linda Vilhjálmsdóttir les úr Frostfiðrildum (3. hluti).

15:30   Fyrirlestur: Sveinn Yngvi Egilsson: Fagurfræði íssins: Jöklar og háleit orðræða.

16:10   Fyrirlestur Jón Yngvi Jóhannsson: Umhverfis jökla með Bjarti og Bensa. Dvöl og barátta í Aðventu og Sjálfstæðu fólki.

17:30   Hlé.

19:00   Kvöldverður í Pakkhúsinu.

Sunnudagur 30. apríl

HOFFELL

10:00   Fyrirlestur: Soffía Auður Birgisdóttir: Fegurð og vábrestir í jökulheimum: Af jöklum í íslenskum bókmenntum.

10:40   Fyrirlestur: Þorvarður Árnason: Með jökulinn í blóðinu – lifun og sjónarvottun klakabrennunnar.

11:20   Gönguferð um Hoffellsjöklulssvæðið undir leiðsögn Þorvarðar og Þrúðmars í Hoffelli.

12:00   Hádegisverður í Hoffelli.

13:00   Lokafyrirlestur og upplestur: Ófeigur Sigurðsson: Táknsæi jökla.

13:40   Samantekt og ráðstefnulok.

Ráðstefnan er öllum opin og engin ráðstefnugjöld eru innheimt. Gestir sjá sjálfir um að útvega sér gistingu og geta fengið málsverði á tilboðsverði ráðstefnudagana. Allir upplýsingar um slíkt verða í ráðstefnugögnum sem gestir fá við komu. Nánari upplýsingar hjá Soffíu Auði Birgisdóttur, s. 4708042, gsm. 8482003
 

Pages

Þú ert að nota: brimir.rhi.hi.is