Snæfellsnes

Fjölmennur ársfundur í Reykjavík

Ársfundur Stofnunar rannsóknasetra Háskóla Íslands var haldinn í Reykjavík 30. mars sl. Fjöldi erinda var fluttur að viðstöddu fjölmenni. 

Jón Atli Benediktsson, rektor Háskóla Íslands, setti fundinn. Að því loknu voru flutt fróðleg erindi um viðfangsefni sem tengjast rannsóknum sem unnar eru við eða í tengslum við setrin. Fyrstu fjögur erindin tengdust ýmsum hliðum ferðaþjónustu:

Anna Dóra Sæþórsdóttir, prófessor í ferðamálafræði við HÍ, fjallaði um samspili ferðaþjónustu og virkjana; Gyða Þórhallsdóttir, doktorsnemi í ferðamálafræði við HÍ, sagði frá greiningu á fjölda ferðamanna og hvert þeir leggja leið sína; Lilja B. Rögnvaldsdóttir, verkefnisstjóri við Rannsóknasetur HÍ á Húsavík, sagði frá könnun á væntingum ferðamanna til valinna áfangastaða og loks fjallaði Eyrún Jenný Bjarnadóttir hjá Rannsóknamiðstöð ferðamála um samfélagsleg áhrif ferðaþjónustu.

Allt eru þetta viðfangsefni sem tengjast umræðu um stöðu ferðaþjónustunnar og þróun hennar,  niðurstöðurnar eru fróðlegar fyrir alla sem áhuga hafa á málefninu auk þess sem rannsóknirnar gefa mikilsverðar upplýsingar sem geta komið að góðum notum við stefnumótun í greininni.

Eftir hlé var m.a. sagt frá rannsóknum á sviði bókmenntafræði og fornleifafræði. Soffía Auður Birgisdóttir, bókmenntafræðingur við rannsóknasetur HÍ á Hornafirði, velti fyrir sér hvað fræðimaður gerir sem rekist hefur á spennandi rannsóknarefni þar sem heimildir eru af skornum skammti. Erindið tengist rannsókn á heimildum um Guðrúnu Sveinbjarnardóttur Egilssonar (f.1831) sem „varð fyrir því óláni“ að kynferði hennar var rangt skilgreint við fæðingu og „hlaut hún að búa við það alla ævi“ eins og segir í einni heimildinni.

Ragnar Edvardsson, fornleifafræðingur við rannsóknasetur HÍ á Vestfjörðum, sagði síðan frá rannsóknum sínum á minjastöðum sem tengjast hvalveiðum Dana, Hollendinga, Norðmanna og fleiri þjóða við Ísland á 19. öld. Í fyrirlestrinum verður fjallað um rannsókninar á hvalveiðistöðvunun og greint frá vel heppnuðu samspili fræðilegra rannsókna, nýtingaráætlunar og ferðamennsku.

Að lokum flutti Sigurður Sigursveinsson, framkvæmdastjóri Háskólafélags Suðurlands, erindi sem hann nefndi Þekkingin og byggðirnar. .

Stofnun rannsóknasetra Háskóla Íslands starfrækir rannsóknasetur á Hornafirði, Suðurlandi, Suðurnesjum, Snæfellsnesi, Vestfjörðum, Ströndum, Norðurlandi vestra og Norðausturlandi. Þá vinnur akademískur starfsmaður að rannsóknum á vegum stofnunarinnar á Austurlandi.

Á vegum rannsóknasetranna eru stundaðar fjölbreyttar rannsóknir. Meðal viðfangsefna eru lífríki hafsins, umhverfi og landnýting, hvalir, fiskar og fuglar, auðlindir, ferðamál, bókmenntir, sagnfræði, fornleifafræði og þjóðfræði. Allt eru þetta rannsóknasvið sem mikill áhugi er á um allt land og gefa tilefni til samstarfs milli setranna við Háskóla Íslands í Reykjavík, sem og aðrar rannsóknastofnanir hérlendis og erlendis. Nánari upplýsingar um starfsemi rannsóknasetra Háskóla Íslands má finna í ársskýrslu stofnunarinnar. 

Myndir á ársfundinum tók Kristinn Ingvarsson ljósmyndari.

Jón Atli Benediktsson, rektor Háskóla Íslands, setti ársfundinnFjölmennt var á fundinumFjölmenni sótti fundinnFjölmenni sótti fundinnJörundur Svavarsson, prófessor og formaður ráðgefandi nefndar Stofnunar rannsóknsetra HÍ, var fundarstjóri. Anna Dóra Sæþórsdóttir, prófessor í ferðamálfræði, flutti erindið: Ferðaþjónusta og virkjanir sem gerendur í byggðaþróun.Anna Dóra svarar spurningum úr sal. Gestir ársfundarinsGestir ársfundarins hlustuðu granntFjölmennt var á ársfundinum,Fjölmennt var. Gyða Þórhallsdóttir doktorsnemi flutti erindið: Ferðamenn – Hvert fara þeir?Lilja B. Rögnvaldsdóttir, verkefnisstjóri við Rannsóknasetur HÍ á Húsavík, flutti erindið: Hver var þetta og hvað vildi hann? Erlendir ferðamenn á Húsavík, Siglufirði, Höfn og í Mývatnssveit sumarið 2015.

Ársfundur Stofnunar rannsóknasetra 30. mars 2017 í Þjóðminjasafni Íslands

Ársfundur Stofnunar rannsóknasetra Háskóla Íslands verður haldinn í sal Þjóðminjasafns Íslands fimmtudaginn 30. mars 2017.  Ársfundurinn hefst kl. 13.30 og dagskrá lýkur kl. 16.  Fundurinn er opinn öllum en gestir eru beðnir að skrá sig hér.

Dagskrá:

13.30 Setning ársfundar.

Jón Atli Benediktsson, rektor Háskóla Íslands.

13.45 Ferðaþjónusta og virkjanir sem gerendur í byggðaþróun.

Anna Dóra Sæþórsdóttir, prófessor í ferðamálafræði við Háskóla Íslands.

14.00 Ferðamenn – Hvert fara þeir?

Gyða Þórhallsdóttir, doktorsnemi Líf- og umhverfisvísindadeild Háskóla Íslands.

14.15 Hver var þetta og hvað vildi hann? Erlendir ferðamenn á Húsavík, Siglufirði, Höfn og í Mývatnssveit sumarið 2015

Lilja B. Rögnvaldsdóttir, verkefnisstjóri við Rannsóknasetur Háskóla Íslands á Húsavík. 

14.30 „Maður getur átt von á öllu mögulegu“. Um áhrif ferðaþjónustu í einstökum samfélögum.

Eyrún Jenný Bjarnadóttir, Rannsóknamiðstöð ferðamála.

14.45 Kaffi

15:15 Heimildarýni, speglanir og spuni. Hvað getur fræðimaður leyft sér?

Soffía Auður Birgisdóttir, sérfræðingur við Rannsóknasetur Háskóla Íslands á Hornafirði.

15.30 Frá fornleifafræðilegum rannsóknum að hagnýtri stýringu og ferðaþjónustu: dæmi af hvalveiðistöðvum.

Ragnar Edvardsson, sérfræðingur við Rannsóknasetur Háskóla Íslands á Vestfjörðum.

15.45 Þekkingin og byggðirnar

Sigurður Sigursveinsson, framkvæmdastjóri Háskólafélags Suðurlands.

16.00 Samantekt.

Sæunn Stefánsdóttir, forstöðumaður Stofnunar rannsóknasetra Háskóla Íslands.

Fundarstjóri: Jörundur Svavarsson, prófessor og formaður ráðgefandi nefndar Stofnunar rannsóknasetra HÍ.

 

Gestir eru vinsamlega beðnir að skrá sig á sérstöku eyðublaði. Skráningu lýkur 28. mars nk.

Þórður Örn Kristjánsson í viðtali við Döffblaðið

Þórður Örn Kristjánsson sem í haust lauk doktorsritgerð sinni frá Háskóla Íslands er í viðtali í Döffblaðinu, tímariti Félags heyrnarlausra. Slóð á blaðið má finna hér.

Ritgerð Þórðar bar heitið: Varpvistfræði æðarfugls (Somateria mollissima) við Breiðafjörð (Breeding ecology of the Common Eider (Somateria mollissima) in Breiðafjörður, West Iceland). Vann Þórður Örn rannsókna sína á vettvangi Rannsóknaseturs Háskóla Íslands í Snæfellsnesi en aðalleiðbeinandi hans var dr. Jón Einar Jónsson, forstöðumaður Rannsóknaseturs Háskóla Íslands á Snæfellsnesi.

Markmið doktorsverkefnisins miðaði að bættum skilningi á varpvistfræði æðarfugla í Breiðafirði. Varphegðun kollna í þéttu varpi í Rifi (1,7 hreiður/m2) var skoðuð til að greina  hvort æðarkollur aðstoði hverja aðra við álegu og sinni því fleiri en einu hreiðri á álegutíma. Metið var hvort dúntekja hefði áhrif á orkubúskap álegufuglanna með því að athuga mun á léttingu álegukollna á dúnhreiðrum og á heyhreiðrum. Samtímis var rannsakað hvort kollur sem lágu á stórum urptum (≥7 egg) eyddu meiri orku en kollur með venjulega urptarstærð (≤6 egg). Ytri sníkjudýrum var safnað úr æðarhreiðrum og fjöldi dúnflóa (Cerotophyllus garei) borinn saman á milli æðarvarpa við Rif og í Hvallátrum. Að lokum var athugað hvort fæða fuglanna á varptíma (maí-júlí) væri breytileg yfir tíma og á milli kynja.

Í ofurþéttu varpi í Rifi staðfesti atferli litmerktra kollna að þær sinna hreiðrum hver annarrar auk sinna eigin. Ástæðan er sennilega sú að kollurnar ruglast vegna hins óeðlilega mikla þéttleika, sterk sjónræn örvun vegna fjölda óvarinna hreiðra nálægt þeirra eigin ýtir svo undir þessa hegðun. Einnig gætu kollurnar átt egg í fleiri en einni urpt í varpinu. Hár fjöldi flóa í þétta varpinu gæti verið ein ástæða þess að kollurnar fara oftar af hreiðri til að snyrta sig en hafa þá staðgöngukollur til að annast hreiðrin á meðan. Æðarkollur í strjálu æðarvarpi í Hvallátrum geta hins vegar skipt um hreiður milli ára ef mikið er um flær en ekki hefur orðið vart sömu áleguhegðunar og á Rifi. Fæðurannsóknin leiddi í ljós að aðalfæða fuglanna að vor/sumarlagi (maí-júlí) reyndist vera flekkunökkvi (Toncella marmorea), sem hefur ekki verið talinn mikilvæg fæða æðarfugla.

Niðurstöður verkefnisins sýna að dúntekja og urptarstærð (2-9 egg) hafa lítil áhrif á afkomu æðarkollna á Íslandi, í það minnsta í venjulegu tíðarfari. Kollur sem hafa byggt upp góðan fituforða fyrir áleguna geta þannig tekist á við bæði dúntekju og aukaegg í urptina án þess að það komi niður á líkamsástandi þeirra eða varpárangri. Dúntekja á Íslandi getur því talist vistvæn hvað kollurnar sjálfar varðar, þar sem áhrif hennar á álegufugla eru óveruleg.

 

Annáll 2016 Rannsóknaseturs Háskóla Íslands á Snæfellsnesi

Starfsmenn voru tveir í ársbyrjun, báðir í 100% starfi, Jón Einar Jónsson forstöðumaður og Árni Ásgeirsson náttúrufræðingur. Ellen Magnúsdóttir líffræðingur kom í 3 vikna vinnu í maí og júní. Þá starfaði mastersnemi frá Frakklandi, Gilles Chen við setrið sumarlangt. Gilles gerði mastersritgerð um þekkingarheim æðarbænda við Agro Paris Tech háskólann, en leiðbeinendur voru Dr. Douglas Nakashima og Jón Einar Jónsson. Gilles tók viðtöl við 20 æðarbændur um allt land og varði ritgerð sína í París í september.

Tveir framhaldsnemar útskrifuðust frá okkur á árinu. Aldís Erna Pálsdóttir varði mastersverkefni sitt um afrán á æðarkolluhreiður 14. janúar. Aldís kynnti verkefni sitt á tveimru ráðstefnum, á Oikos í Finnlandi í febrúar og á Vistís í Reykjavík í mars með veggspjaldi. Aldís er nú doktorsnemi við rannsóknasetrið á Suðurlandi. Þórður Örn Kristjánsson doktorsnemi lauk við doktorsrigerð sína um varpvistfræði æðarfugls og varði hana 2. september. Andmælendur við doktorsvörn Þórðar voru Dr. Sveinn Are Hanssen frá Norsk Polar Institututt og Dr. Jonathan Green frá Háskólanum í Liverpool.

Í apríl hélt rannsóknasetrið á Snæfellsnesi upp á 10 ára afmæli sitt, fyrst með afmælisfyrirlestri í Ráðhúsinu 6. apríl og svo í tengslum við Ársfund Stofnana rannsóknasetra Háskóla Íslands. Rúmlega 70 manns sóttu ársfundinn sem haldinn var á Fosshóteli Stykkishólmi 15. apríl. Daginn áður héldu forstöðumenn rannsóknasetranna vinnufund á Hótel Fransiskus sem endaði með kvöldverði á Narfeyrarstofu. Ársfundinum lauk svo með móttöku í Æðarsetri Íslands að Frúarstíg.

Æðarkolla á hreiðri. Ljósm. Árni Ásgeirsson

Æðarkollur voru merktar þriðja sumarið í röð. Nýmerktar voru 204 æðarkollur, auk þess sem 83 voru endurheimtar með merki frá fyrri árum. Farið var í sömu sjö eyjar og heimsóttar voru 2015. Gott tíðarfar auðveldaði merkingar og nú hafa 418 æðarkollur verð merktar við Stykkishólm frá og með 2014. Varptími æðarkollna hófst á nokkuð eðllegum tíma eða upp úr 20. maí og lauk merkingum um miðjan júní. Varpárangur var nokkru lakari en 2014-2015 en var þó 50-70% í Landey, Hjallsey og Stakksey.

 

 

Árið 2014 hófum við að merkja æðarkollur í Landey, Hjallsey og Stakksey í samstarfi við norska SEATRACK-verkefnið. Settir voru út 46 nýjir hnattstöðuritar á æðarkollur og 34 slíkir endurheimtust frá fyrri árum. Jón Einar Jónsson sótti vinnufund SEATRACK í Tromsö í nóvember.

Æðarungar voru taldir við Breiðafjörð í 10. sinn og var fjöldi þeirra í meðallagi eða 0.6 ungar/kollu. Rituvarp gekk mun skár en í mörg undanfarin ár og sáust nú 2-3 ungar í flestum hreiðrum. Rituhreiður á suðursvæði Breiðafjarðar eru mun færri en þau voru fyrir 20 árum en fjöldi þeirra er nokkuð stöðugur frá og með árinu 2006. Flest ritubjörgin litu mun betur út í ár en í mörg ár þar á undan, og sömuleiðis var varp lunda og kríu líflegra en oft áður.

Ritutalningin er samstarfsverkefni með Náttúrustofu Vesturlands. Stofnanirnar fóru einnig í Kolgrafafjörð 22. júlí til botnsýnatöku 4. árið í röð og þá voru vatnafuglar á Snæfellsnesi taldir 6. árið  í röð.

Þrjár birtingar komu út í alþjóðlegum vistfræðitímJón Jakobsson, Gilles Chen og Árni Ásgeirsson. Ljósm. Jón Einar Jónssonaritum, um sníkjudýr í æðarhreiðrum,  um komu æðarkollna í varp Rifi og svo um fæðunám snjógæsa á 1. ári. Á ársfundi Æðarræktarfélags Íslands 12. nóvember hélt Jón Einar Jónsson erindi um mikilvægi klóþangs fyrir ungauppeldi æðarfugls. Sjálfboðaliðar SEEDS heimsóttu Rannsóknasetrið 20. júní og fengu að kynnast starfseminni. Loks hlaut Jón Einar akademískan framgang innan HÍ þann 1. júlí í starf vísindamanns.

Starfsmenn Rannsóknasetursins þakka fyrir sig og fyrir samstarfið á árinu 2016.

 

Nýtt rannsóknasetur Háskóla Íslands á Ströndum stofnað

Nýtt rannsóknasetur, Rannsóknasetur Háskóla Íslands á Ströndum - Þjóðfræðistofa, hefur verið sett á laggirnar. Rannsóknir í þjóðfræði verða þar í öndvegi og sérstök áhersla á miðlun og hagnýtingu þjóðfræðilegrar þekkingar. Rannsóknasetrið er staðsett á Hólmavík.

Rannsóknasetur Háskóla Íslands á Ströndum er hluti af Stofnun rannsóknasetra Háskóla Íslands en innan stofnunarinnar eru fyrir sjö rannsóknasetur víða um land, á Suðurnesjum, Snæfellsnesi, Vestfjörðum, Norðurlandi vestra, Húsavík, Hornafirði og Suðurlandi. Viðfangsefni rannsókna sem setrin standa fyrir eru fjölbreytt, en á meðal þeirra eru lífríki hafsins, umhverfi og landnýting, hvalir, fiskar og fuglar, ferðamál, bókmenntir, sagnfræði, fornleifafræði og nú þjóðfræði.

Með samningi mennta- og menningarmálaráðuneytisins og Stofnunar rannsóknasetra Háskóla Íslands frá byrjun ársins 2016 var sett af stað vinna við að greina tækifæri og leiðir við að koma rannsóknasetrinu á fót. Áður hafði Strandagaldur ses staðið fyrir rekstri þekkingarsetursins Þjóðfræðistofu á Hólmavík frá árinu 2008, en starfsemi hennar hafði lagst af. Á grunni þessarar vinnu varð úr að ráðuneytið fól Stofnun rannsóknasetra Háskóla Íslands að hefja starfsemi þessa nýja rannsóknaseturs, í góðri samvinnu við heimamenn og að hluta til er byggt á þeim góða grunni sem áður hefur verið lagður með starfsemi Þjóðfræðistofu Strandagaldurs.

Jón Jónsson þjóðfræðingur hefur verið ráðinn verkefnisstjóri Rannsóknaseturs Háskóla Íslands á Ströndum – Þjóðfræðistofu og hóf hann störf í byrjun mánaðarins. Jón hefur síðustu árin starfað sem menningarfulltrúi Vestfjarða. Aðsetur rannsóknasetursins er í Þróunarsetrinu á Hólmavík.

Strandamenn ætla að fagna stofnun Rannsóknaseturs Háskóla Íslands á Ströndum – Þjóðfræðistofu strax um helgina. Laugardagskvöldið 10. september verður haldin þjóðtrúarkvöldvaka í samvinnu hins nýja seturs og Sauðfjárseturs á Ströndum sem ber yfirskriftina Leyndardómar fjörunnar, þjóðtrú, ótti og óhugnaður. Jón Jónsson mun þar segja frá þjóðtrú og þjóðsögum tengdum heimsóknum ísbjarna til landsins og heitir erindi hans: Ísbirnir éta ekki óléttar konur! Á kvöldvökunni flytja einnig erindi þjóðfræðingarnir Dagrún Ósk Jónsdóttir og Kristinn H.M. Schram sem var fyrsti forstöðumaður Þjóðfræðistofu Strandagaldurs. Kvöldvakan verður í félagsheimilinu Sævangi og hefst kl. 20:00.

--------
Nánari upplýsingar gefur Jón Jónsson (jonjonsson@hi.is / gsm: 831 4600), verkefnisstjóri Rannsóknaseturs Háskóla Íslands á Ströndum – Þjóðfræðistofu.

Jón Einar Jónsson hlýtur framgang í starf vísindamanns

Jón Einar Jónsson, forstöðumaður Rannsóknaseturs HÍ á Snæfellsnesi, hlýtur framgang í starf vísindamanns við Háskóla Íslands frá 1. júlí. Staðan er sambærileg við starfsheitið prófessor við deildir skólans.

Akademískir starfsmenn háskólans geta samkvæmt reglum skólans sótt um framgang í starfi fyrir 1. nóvember ár hvert. Er í höndum sérstakrar framgangsnefndar að leggja mat á umsóknirnar að fengnu áliti dóm- og framgangsnefnda fræðasviðanna og forseta þeirra.

Í stefnu Stofnunar rannsóknasetra Háskóla Íslands er ákvæði um starfsþróun en þar segir:

,,Starfsþróun er mikilvægur þáttur mannauðsstefnunnar og er lögð áhersla á að framgangur akademísks starfsfólks rannsóknasetranna verði í takt við það sem gerist annars staðar innan Háskóla Íslands. Þá verði einnig sérstakur gaumur gefinn að starfsþróun annarra starfsmanna setranna en akademískra sérfræðinga og þeir hvattir til að sækja sér sí- og endurmenntun."

 

 Stofnun rannsóknasetra Háskóla Íslands óskar Jóni Einari hjartanlega til hamingju með árangurinn.

Vel sóttur ársfundur í Stykkishólmi

Ársfundur Stofnunar rannsóknasetra Háskóla Íslands var haldinn í Stykkishólmi 15. apríl sl. Í ár eru tíu ár frá stofnun Rannsóknaseturs Háskóla Íslands á Snæfellsnesi og flutti Jón Einar Jónsson forstöðumaður setursins yfirlitserindi þar sem hann sagði frá rannsóknum á æðarfugli sem stundaðar hafa verið við setrið.  Afrakstur rannsóknanna byggja m.a. á góðu samstarfi við æðarbændur, heimamenn, sveitarfélagið og Náttúrustofu Vesturlands. Með samstarfi og stuðningi þessara aðila má ná miklum árangri í starfi háskólastarfsemi á landsbyggðinni eins og sýnir sig með Rannsóknasetri Háskóla Íslands á Snæfellsnesi. Á ársfundinum voru flutt áhugaverð erindi sem mörg hver tengdust lífríki Breiðafjarðar, önnur um náttúru og nytjar í víðum skilningi og umgengni mannsins við náttúruna. 

Að loknum ávörpum Jóns Atla Benediktssonar, rektors Háskóla Íslands, og Sturlu Böðvarssonar, bæjarstjóra Stykkishólmbæjar, flutti Brynhildur Davíðsdóttir, prófessor í umhverfis- og auðlindafræði við Háskóla Íslands, erindi um hringrásarhagkerfið. Þá fjallaði Róbert Arnar Stefánsson, forstöðumaður Náttúrustofu Vesturlands, um hina auðugu þörungaskóga Breiðafjarðar í erindi sem hann nefndi „Regnskógar norðursins.“ Aldís Erna Pálsdóttir sagði frá afráni á æðarhreiðrum í Breiðafirði, en hún lauk nýlega meistaraprófi í líffræði frá Háskóla Íslands. Unnur Birna Karlsdóttir, sérfræðingur við starfsstöð Stofnunar rannsóknasetra Háskóla Íslands á Egilsstöðum, fjallaði um rannsókna sína á sögu hreindýra á Íslands í erindi sínu og Hrönn Egilsdóttir, doktorsnemi við Jarðvísindadeild Háskóla Íslands, fjallaði um súrnun sjávar í erindi sínu ,,Súrnun sjávar við Íslands. Rannsóknir og staða þekkingar." 

Að dagskrá lokinni var haldið í Æðarsetur Íslands sem opnar innan skamms í Stykkishólmi. Nánari upplýsingar um dagskrá fundarins er að finna á vefsíðu Stofnunar rannsóknasetra Háskóla Íslands.

Stofnun rannsóknasetra Háskóla Íslands starfrækir rannsóknasetur á Hornafirði, Suðurlandi, Suðurnesjum, Snæfellsnesi, Vestfjörðum, Norðurlandi vestra og Norðausturlandi. Þá vinnur akademískur starfsmaður að rannsóknum á vegum stofnunarinnar á Austurlandi.

Á vegum rannsóknasetranna eru stundaðar fjölbreyttar rannsóknir. Meðal viðfangsefna eru lífríki hafsins, umhverfi og landnýting, fiskar og fuglar, auðlindir, ferðamál, bókmenntir, sagnfræði og fornleifafræði. Allt eru þetta rannsóknasvið sem mikill áhugi er á um allt land og gefa tilefni til samstarfs milli setranna við Háskóla Íslands í Reykjavík, sem og aðrar rannsóknastofnanir hérlendis og erlendis. Nánari upplýsingar um starfsemi rannsóknasetra Háskóla Íslands má finna í ársskýrslu stofnurinnar.

Myndir á ársfundinum tók Kristinn Ingvarsson ljósmyndari.

Jón Einar Jónsson forstöðumaður Rannsóknaseturs Háskóla Íslands á Snæfellsnesi

Sturla Böðvarsson bæjarstjóri Stykkishólmsbæjar

Jón Atli Benediktsson rektors Háskóla Íslands

 

Ársskýrsla Stofnunar rannsóknasetra 2015

Ársskýrsla Stofnunar rannsóknasetra Háskóla Íslands 2015 er komin í birtingu á vef stofnunarinnar. Skýrslan er ríkulega myndskreytt og greinir frá helstu áföngum í starfsemi rannsóknasetra Háskóla Íslands á landsbyggðinni á árinu 2015. Ársskýrslan er að venju gefin út í tengslum við ársfund Stofnunar rannsóknasetra HÍ en hann er að þessu sinni haldinn í Stykkishólmi í tilefni af því að 10 ár eru síðan Rannsóknasetur Háskóla Íslands á Snæfellsnesi tók til starfa.

Ársfundurinn verður í Hótel Stykkishólmi föstudaginn 15. apríl og hefst dagskráin kl. 13.  Illugi Gunnarsson mennta- og menningarmálaráðherra setur fundinn og Jón Atli Benediktsson, rektor Háskóla Íslands og Sturla Böðvarsson, bæjarstjóri Stykkishólmsbæjar, flytja ávörp. Á fundinum verða flutt fjölbreytt og áhugaverð erindi sem öll tengjast náttúru og nytjum, en nánar má fræðast um dagskrá ársfundarins á vefsíðu Stofnunar rannsóknasetra Háskóla Íslands .

Ársfundur Stofnunar rannsóknasetra 2016 haldinn í Stykkishólmi 15. apríl nk.

Ársfundur Stofnunar rannsóknasetra Háskóla Íslands verður haldinn í Stykkishólmi föstudaginn 15. apríl nk. Fundurinn fer fram á Hótel Stykkishólmi.

Unnið er að dagskrá og nánari tilhögun ársfundarins. Við sama tækifæri verður 10 ára afmæli Rannsóknaseturs HÍ á Snæfellsnesi fagnað. Gera má ráð fyrir að ársfundurinn hefjist um hádegisbil og standi fram eftir degi. Boðið verður upp á sætaferðir frá Aðalbyggingu Háskóla Íslands í Stykkishólm og tilbaka.

Varp æðarfugls (Somateria mollissima) og afrán á hreiðrum í Breiðafirði

Aldís Erna Pálsdóttir flutti fyrirlestur um verkefni sitt til meistaraprófs í líffræði 14. janúar sl.. Heiti verkefnisins er Varp æðarfugls (Somateria mollissima) og afrán á hreiðrum í Breiðafirði.
 
Æðardúnn er verðmæt útflutningsvara og dúntekja því mikilvæg tekjulind fyrir marga landeigendur. Með því að lágmarka afrán á hreiðrum æðarfugls (Somateria mollissima) má bæta afrakstur og nýtingu dúns. Auk þess eru ungarnir líklegir til að snúa aftur til sama svæðis nái þeir fullorðinsaldri. Rannsókn þessi lagði mat á tengsl nokkurra þátta við tíðni afráns og hvaða afræningjar væru mest áberandi í æðarvörpum í fimm eyjum á sunnanverðum Breiðafirði. Æðarvörp voru heimsótt tvisvar yfir varptímabilið árin 2014 og 2015, auk þess sem notaðar voru myndavélar búnar hreyfiskynjurum. Af 178 hreiðrum í rannsókninni voru 29 (16%) rænd árin 2014 og 2015. Mest áberandi afræningjarnir voru svartbakur (Larus marinus) og hrafn (Corvus corax). Þeir þættir sem tengdust afráni voru gerð nánasta umhverfis, upphafsdagsetning álegu og heimsóknatíðni afræningja. Afrán var minna á hreiður í ætihvönn (Angelica archangelica) miðað við annað umhverfi. Seinni hluta varptímans hylur hvönnin hreiðrin og byrgir þar með flugafræningjum sýn ofan frá. Hreiður voru líklegust til að vera rænd ef verpt var snemma en afrán minnkaði þegar leið á varptímann. Líkleg skýring er að í byrjun varptíma voru hlutfallslega fleiri afræningjar á hvert hreiður, gróður lítið vaxinn og lítinn ávinning að hafa af nærliggjandi kollum, máfum og kríum (Sterna paradisaea). Afræningjar heimsóttu oftar hreiður sem síðar voru rænd, eða að meðaltali 1,7 sinnum á dag, en einungis 0,7 sinnum hreiður þar sem ungar klöktust. Mögulegt er að afræningjar heimsæki hreiður sem þeir vita um til að reyna að fæla kollur af hreiðrunum.
 
Leiðbeinendur Aldísar Eru voru Jón Einar Jónsson, forstöðumaður Rannsóknaseturs HÍ á Snæfellsnesi, og Róbert Arnar Stefánsson, forstöðumaður Náttúrustofu Vesturlands, en Aldís vann verkefni sitt við rannsóknasetrið.
 

Pages

Þú ert að nota: brimir.rhi.hi.is