Marianne Rasmussen hlýtur framgang í starf fræðimanns

Marianne Rasmussen, forstöðumaður Rannsóknaseturs HÍ á Húsavík, hlaut framgang í starf fræðimanns við Háskóla Íslands frá 1. júlí sl. Staðan er sambærileg við starfsheitið dósent við deildir skólans.
 
Akademískir starfsmenn háskólans geta samkvæmt reglum skólans sótt um framgang í starfi fyrir 1. nóvember ár hvert. Er í höndum sérstakrar framgangsnefndar, sem skipuð er aðstoðarrektor vísinda og kennslu og fulltrúum allra fræðasviða, að leggja mat á umsóknirnar að fengnu áliti dóm- og framgangsnefnda fræðasviðanna og forseta þeirra.
 
Í nýrri stefnu Stofnunar rannsóknasetra Háskóla Íslands er einmitt ákvæði um starfsþróun en þar segir:
,,Starfsþróun er mikilvægur þáttur mannauðsstefnunnar og er lögð áhersla á að framgangur akademísks starfsfólks rannsóknasetranna verði í takt við það sem gerist annars staðar innan Háskóla Íslands. Þá verði einnig sérstakur gaumur gefinn að starfsþróun annarra starfsmanna setranna en akademískra sérfræðinga og þeir hvattir til að sækja sér sí- og endurmenntun."
 
Stofnun rannsóknasetra Háskóla Íslands óskar Marianne hjartanlega til hamingju með árangurinn. 
Þú ert að nota: brimir.rhi.hi.is