Fjársjóður í fjölskyldualbúminu - fyrirlestur um fjölskyldualbúm og innihald þeirra - 23. mars klukkan 15:00

Fjársjóður í fjölskyldualbúminu

- fyrirlestur um fjölskyldualbúm og innihald þeirra  -

Leynist fjársjóður í fjölskyldualbúminu þínu? Hefur þú áttað þig á gildi gömlu fjölskyldumyndanna?

Komdu í Rannsóknarsetur HÍ á Skagaströnd í gamla kaupfélaginu laugardaginn 23. mars klukkan 15:00 og fáðu svör við þessum spurningum og fleirum.

Flestir hafa reynslu af því að fletta gömlum fjölskyldualbúmum og haft gagn og gaman af. Í erindinu veltir Eggert Þór Bernharðsson prófessor í hagnýtri menningarmiðlun við Háskóla Íslands upp ýmsum spurningum sem vaknað hafa við skoðun og könnun á fjölskyldualbúmum frá tiltekinni fjölskyldu, einkum frá árunum 1930 til 1970. Hugað verður að því hvers konar sögu sé hægt að lesa út úr myndaalbúmum af þessu tagi, hvert sé hugsanlegt gildi fjölskyldumynda, hvað kunni að einkenna þær og hvaða möguleika þær bjóði upp á sem heimildir.

Heitt verður á könnunni og eftir fyrirlesturinn mun Eggert sitja fyrir svörum um það sem brennur á fólki í sambandi við myndirnar sínar.

Þá verður líka sett upp lítil sýning á staðnum á fjölskyldumyndum af Skagstrendingum úr Ljósmyndasafninu. Fólk verður beðið um að hjálpa til við að þekkja þá sem óþekktir eru á myndunum.

Aðgangur ókeypis og allir hjartanlega velkomnir.

Rannsóknarsetur Háskóla Íslands á Skagaströnd

Þú ert að nota: brimir.rhi.hi.is