Skáld á Skagaströnd

Fimmtudaginn 31. október lásu skáldin Jón Kalman Stefánsson, Eiríkur Guðmundsson og Óskar Árni Óskarsson upp úr verkum sínum og spjölluðu  við gesti í Rannsóknasetri Háskóla Íslands á Norðurlandi vestra í gamla kaupfélagshúsinu á Skagaströnd.
Jón Kalman Stefánsson er með þekktustu rithöfundum samtímans, ekki síst fyrir bækurnar: "Himnaríki og helvíti", "Harmur englanna" og "Hjarta mannsins". Ásamt skáldsögum hefur hann gefið út ljóðabækur og smásögur. Þrjár af bókum hans hafa verið tilnefndar til Bókmenntaverðlauna Norðurlandaráðs og hann hlaut Íslensku bókmenntaverðlaunin 2005. 2013 kom  út eftir hann skáldsagan:"Fiskarnir hafa enga fætur" og las Jón upp úr henni fyrir gesti. 
Eiríkur Guðmundsson er landsmönnum bæði kunnur sem dagskrárgerðarmaður og umsjónarmaður útvarpsþáttarins Víðsjár og fyrir skáldsögur sínar: "39 þrep á leið til glötunar", "Undir himninum" og "Sýrópsmánann". Nýjasta skáldsaga Eiríks heitir: "1983" og kom hún út á haustdögum. Eiríkur las upp úr handriti sögunnar fyrir gesti því bókin var ekki komin úr prentun. 
Óskar Árni Óskarsson er með virtustu ljóðskáldum og þýðendum okkar, og hefur bæði verið tilnefndur til Þýðingarverðlaunanna og Íslensku bókmenntaverðlaunanna. Meðal verka hans má nefna:  "Ljós til að mála nóttina", "Vegurinn til Hólmavíkur" og "Kuðungasafnið". Síðastnefnda bókin er safn smáprósa, en Óskar Árni hefur náð undraverðum tökum á því formi. "Það sem við tölum um þegar við tölum um ást" er heiti á þýðingu hans á smásögum bandaríska höfundsins Raymond Carver en Óskar las meðal annars úr þeirri þýðingu.
Eftir skáldakynninguna, sem var ágætlega sótt, tóku skáldin þátt í spjalli við gesti og svöruðu spurningum um verk sín. 
Þú ert að nota: brimir.rhi.hi.is