Rannsóknaverkefni um eiginleika æðardúns unnið á Snæfellsnesi

 

Thomas Holm Carlsen vinnur að verkefninu Eiginleikar æðardúns: samanburður á gæðum og eiginleikum milli landa og hreinsunaraðferða í samstarfi við Rannsóknasetur Háskóla Íslands á Snæfellsnesi. Þrátt fyrir að eiginleikar æðardúns séu taldir einstakir hefur lítið verið gert til að mæla í hverju þeir felast eða hvernig megi mæla gæði æðardúns. Verkefninu er ætlað að bæta úr því. Thomas kom til liðs við rannsóknasetrið í september 2013 og er hann í 30% stöðu við setrið en starfar 70% fyrir Bioforsk í Noregi. 

Framleiðnisjóður Landbúnaðarins og Æðarræktarfélag Íslands styrkja verkefnið sem er samstarfsverkefni Rannsóknaseturs Háskóla Íslands á Snæfellsnesi, Íslensks æðardúns ehf. Í Stykkishólmi, og Bioforsk í Noregi (Norska Landbúnaðar- og umhverfisrannsóknastofnunin). Thomas Holm er verkefnisstjórinn en Jón Einar Jónsson og Erla Friðriksdóttir eru samstarfsaðilar.

 

Megin markmiðið er að bæta skilning Íslendinga á eiginleikum æðardúns og hvernig hann er frábrugðinn hinum algenga gæsadún, og athuga hvort þessir eiginleikar æðardúns séu misjafnir milli landa. Fyrir liggja tilraunamælingar á fyllingu, samloðun og smásjárgerðar æðardúns, unnar árið 2013. Í þessu verkefni verður stigið næsta skref, aðferðafræði til að mæla eiginleika æðardúns verður full kláruð og gerður samanburður á dúnsýnum við stýrðar tilrauna aðstæður. Bornar verða saman hreinsunaraðferðir fyrir æðardún á sýnum af óhreinsuðum dún, flokkuðum eftir hreiðrum frá mismunandi æðarvörpum á Íslandi. Þá verða sömu eiginleikar æðardúns bornir saman milli Íslands, Grænlands, Kanada, Svalbarða, Noregs, Skotlands og Danmerkur, og verður leitað til samstarfsfólks okkar þar með beiðni um æðardún til rannsóknarinnar.

 

Nánar er fjallað um verkefnið á heimasíðu Rannsóknaseturs Háskóla Íslands á Snæfellsnesi.

 

Mynd: Skessuhorn (Magnús Þór Hafsteinsson)

Þú ert að nota: brimir.rhi.hi.is