Dagbækur á Ströndum (handritalestur)

Mikið er til af persónulegum heimildum í handritasöfnum, m.a. af Ströndum. Eitt af verkefnum Rannsóknasetursins er að rannsaka dagbækur af svæðinu frá fyrri tímum og gera þær aðgengilegar fyrir fræðimenn og almenning. Unnið er að nokkrum verkefnum og uppskriftum í tengslum við dagbækurnar. 

Ef fólk veit um dagbækur Strandamanna á söfnum eða í einkaeigu erum við áfjáð í að fá vitneskju um þær (jonjonsson@hi.is). 
 

Tilraunaverkefni fyrir alla: Að skrifa upp handrit

Frá 2017 hefur Rannsóknasetrið staðið fyrir tilraunaverkefni þar sem ætlunin er að skrifa upp handritaðar dagbækur sem tengjast Ströndum, og gera afraksturinn aðgengilegan. Öll sem áhuga hafa mega taka þátt í þessu verkefni. Skjölin sem unnið er með eru aðgengileg neðar á þessari síðu. Einnig getið þið haft samband við Rannsóknasetur HÍ á Ströndum - Þjóðfræðistofu í netfanginu jonjonsson@hi.is ef þið viljið vera með.

Best er að hafa tvo skjái opna þegar unnið er að slíkri uppskrift. Annan með myndunum af handritinu sjálfu, en það væri líka hægt að prenta út nokkrar síður af því til að vinna með. Hinn með skjalinu sem skrifað er í sem er google-doc ritvinnsluskjal sem margir geta unnið í á sama tíma.

Þið megið vinna að uppskriftum hvar sem er í handritinu. Það er ekki ætlast til að þið skrifið upp stafrétt, heldur notið nútímastafsetningu. Ef þið getið ekki lesið einstök orð setjið þá spurningamerki í uppskriftina í staðinn fyrir ólæsilega orðið. Næsti sem spreytir sig getur kannski leyst gátuna. Það lærist ótrúlega fljótt að lesa 19. aldar skrift, þótt það geti verið snúið til að byrja með. 

Verkefnið er samvinnuverkefni Rannsóknasetursins og Landsbókasafns Íslands - Háskólabókasafns. Þið megið öll skoða afraksturinn og stöðu mála við uppskriftirnar hvenær sem er, þetta er aðgengilegt í köflum hér neðar á síðunni. Munið bara að þetta er allt á vinnslustigi ennþá. 
 

Dagbækur frá 1918

Rannsóknasetur HÍ á Ströndum hefur tekið til sérstakrar skoðunar 3 dagbækur Strandamanna frá árinu 1918 í tengslum við verkefnið Strandir 1918 sem var samvinnuverkefni fjölda aðila á Ströndum í tengslum við 100 ára fullveldisafmæli Íslands. 

Hér má nálgast uppskrift á dagbók Þorsteins Guðbrandssonar á Kaldrananesi frá árinu 1918 (Lbs 3809 8vo), með nútímastafsetningu. Skjalið var fyrst birt af Rannsóknasetrinu á héraðsfréttavefnum strandir.is á Þorláksmessu 2018 og er einnig aðgengilegt í handriti á Sauðfjársetri á Ströndum þar sem sýningin um Strandir 1918 er uppi. Einnig má skoða dagbókina hér á vefnum: 

Hinar dagbækurnar sem unnið er með í verkefninu Strandir 1918 eru dagbók Níelsar Jónssonar á Grænhól á Gjögri í Árneshreppi og dagbók Kristjáns Helgasonar á Þambárvöllum í Bitru. 
 

Sighvatur Borgfirðingur og dagbókin hans

Handrit Sighvatur

Þegar hefur verið skrifaður upp hluti af dagbók Sighvatar Grímssonar Borgfirðings. Miðað er við árin 1869-1873, en þá bjó hann á Klúku í Bjarnarfirði á Ströndum.

Þaðan flutti Sighvatur með fjölskyldu sína að Höfða í Dýrafirði og var þessi sískrifandi alþýðufræðimaður síðan kenndur við þann bæ. Skriftin hans Sighvatar er auðlæsileg miðað við 19. aldar skrift.  

Hér er tengill inn á google.doc skjalið þar sem vinnan fór fram: 

Uppskrift á 5 árum í dagbók Sighvatar Grímssonar Borgfirðings

Hér eru tenglar inn á dagbókina hans á vefnum handrit.is.

Dagbók Sighvatar Borgfirðings 1869-1873 (uppskrift lokið)

 

Dagbók Jóns Jónssonar í Miðdalsgröf, Naustavík, Heiðarbæ, Fitjum og Ósi 

Jón Jónsson (1795-1879) hélt dagbók frá ársbyrjun 1846 þangað til þremur dögum áður en hann dó vorið 1879. Dagbókin er óvenjuleg að því leyti að hún lýsir fátækt í sveitasamfélaginu á 19. öld sérstaklega vel. Jón er fyrst bóndi í Miðdalsgröf, síðar húsmaður í Naustavík og á hálfgerðum hrakningi á köflum á gamals aldri. 

Uppskrift á dagbók Jóns Jónssonar 1846-1860 (google.doc skjal)

Uppskrift á dagbók Jóns Jónssonar 1861-1870 (google.doc skjal) - uppskrift lokið

Uppskrift á dagbók Jóns Jónssonar 1871-1879 (google doc skjal) - uppskrift lokið

Tengill á dagbókina sjálfa á vefnum handrit.is er hér á eftir, en handritasafn Landsbókasafns Háskólabókasafns ljósmyndaði handritið sérstaklega fyrir þessa uppskriftarvinnu. Þau sem vilja leggja hönd á plóg geta nýtt þessi skjöl, en einnig fengið handritið á pdf-formi með því að senda skeyti á Rannsóknasetur HÍ á Ströndum. Skriftin er dálítið erfið viðureignar, eins og sjá má á myndinni hér að neðan.

Dagbók Jóns Jónsson á handrit.is (myndir á handrit.is)

Þú ert að nota: brimir.rhi.hi.is