Samvinna við námsmenn

Verkefni og rannsóknir námsmanna í tengslum við Rannsóknasetur HÍ á Ströndum - Þjóðfræðistofu: 

Dagrún Ósk Jónsdóttir þjóðfræðingur og doktorsnemi vann á árunum 2016-2019 að nýsköpunarverkefni í samvinnu við Rannsóknasetur HÍ á Ströndum sem ber nafnið Náttúrubarnaskólinn. Verkefnið snýst um hugmyndavinnu, uppbyggingu og þróun Náttúrubarnaskóla í tengslum við starfsemi Sauðfjárseturs á Ströndum, sem er viðurkennt safn og mikilvæg menningarstofnun í héraðinu. Verkefnið byggir á hugmynd um að nýta þjóðfræðilega og svæðisbundna þekkingu, umhverfi og menningarminjar í landslaginu, ásamt því að beita náttúrutúlkun og safnkennslufræðum við vandaða uppbyggingu menntatengdrar ferðaþjónustu. Verkefnið fékk styrk úr Nýsköpunarsjóði námsmanna 2016 og 2017 og hefur fengið stuðning víðar, m.a. frá Uppbyggingarsjóði Vestfjarða, Safnasjóði og Barnamenningarsjóði. Jón Jónsson hefur haft fræðilega umsjón með verkefninu sem er unnið í samvinnu við Sauðfjársetur á Ströndum.

Dagrún Ósk Jónsdóttir MA í þjóðfræði vann einnig að miðlunarverkefni sem bar vinnutitilinn Mannát og feminismi sumarið 2018 í samvinnu við Rannsóknasetur HÍ á Ströndum, með styrk frá Nýsköpunarsjóði námsmanna. Framlag setursins var aðstaða, yfirlestur og ráðgjöf, ásamt umbrotsvinnu. Afraksturinn var sýningin Skessur sem éta karla ... Umsjónarmaður með Nýsköpunarsjóðsverkefninu  var Rósa Þorsteinsdóttir hjá Stofnun Árna Magnússonar í íslenskum fræðum. 

Guðrún Gígja Jónsdóttir MA-nemi í hagnýtri menningarmiðlun og Agnes Jónsdóttir þjóðfræðinemi unnu sumarið 2018 að nýsköpunarverkefni á vegum Rannsóknaseturs HÍ á Ströndum, m.a. með styrk frá Nýsköpunarsjóði námsmanna. Verkefnið hafði titilinn Hólmavík - íbúabyggð og ferðamannastaður. Jón Jónsson hafði umsjón með verkefninu sem unnið var í samvinnu við sveitarfélagið Strandabyggð

Þú ert að nota: brimir.rhi.hi.is