Um Rannsóknasetrið á Ströndum

HólmavíkRannsóknasetur HÍ á Ströndum - Þjóðfræðistofa var stofnað í september 2016 og Jón Jónsson þjóðfræðingur hóf þá störf sem verkefnisstjóri hjá setrinu. 

Jón hafði áður starfað sem menningarfulltrúi Vestfjarða í tæpan áratug og rekið eigið fyrirtæki Sögusmiðjuna sem unnið hefur margvísleg verkefni á sviði miðlunar sögu og þjóðfræða.

Rannsóknir í þjóðfræði eru í öndvegi hjá setrinu og sérstök áhersla á miðlun og hagnýtingu þjóðfræðilegrar þekkingar. Aðsetur rannsóknasetursins er í Þróunarsetrinu á Hólmavík. 

Forsaga setursins er sú að með samningi mennta- og menningarmálaráðuneytisins og Stofnunar rannsóknasetra Háskóla Íslands frá byrjun árs 2016, var sett af stað vinna við að greina tækifæri og leiðir við að koma rannsóknasetrinu á fót. Áður hafði sjálfseignarstofnunin Strandagaldur staðið fyrir rekstur Þjóðfræðistofu á Hólmavík frá árinu 2008-2014, en starfsemi hennar hafði lagst af. Á grunni þessarar vinnu fól ráðuneytið Stofnun rannsóknasetra Háskóla Íslands að hefja starfsemi þessa nýja rannsóknaseturs, í góðri samvinnu við heimamenn. Að hluta til er byggt á þeim kynngimagnaða grunni sem áður var lagður með starfsemi Þjóðfræðistofu Strandagaldurs.

Facebook-síðu setursins á Ströndum má finna undir þessum tengli

Rannsóknarsetrið á Ströndum er tilbúið í margvísleg samvinnuverkefni sem tengjast rannsóknum, kennslu og miðlun. Þetta á bæði við um samvinnu við þjóðfræðinga og þjóðfræðinema hér á landi og erlendis, en einnig fræðimenn á öðrum sviðum þar sem nálgunin er þverfagleg, listafólk, skóla, söfn og menningarstofnanir. Þeir sem hafa hugmynd um samvinnu eru hvattir til að  hafa samband við Jón Jónsson - jonjonsson@hi.is.

 

Þú ert að nota: brimir.rhi.hi.is