Hólmavík

Húmorsþing á Hólmavík

Laugardaginn 14. apríl verður haldið stórmagnað húmorsþing á Hólmavík. Þar verður blandað saman fyrirlestrum, fróðleik og fjöri og öll sem áhuga hafa hjartanlega velkomin. Um daginn verða málstofur og þjóðfræðilegir fyrirlestrar um húmor, móttaka í Rannsóknasetri HÍ á Ströndum - Þjóðfræðistofu, stórmagnað kvöldverðar hlaðborð á Café Riis og síðan skemmtun um kvöldið, PubQuiz með gamansömu húmorsívafi, tónlistaratriði og uppistand. Á eftir verður dansað smávegis. Það er því um að gera að taka daginn frá og stefnuna norður á Strandir. 

 

 

 

 

Dagskrá Húmorsþingsins:

16:30 - Fróðleikur og húmorsfræði - staðsetning: Pakkhús, Café Riis

Kristinn Schram: Húmorfræði á fimm mínútum

Kristín Einarsdóttir: Það er ekkert öruggt að hann smæli

Agnes Jónsdóttir: "Hvað er svona fyndið?" Uppistand sem einhliða samtal
Jón Jónsson: Skemmtikraftar eða aðhlátursefni: Framkoma við förufólk í gamla sveitasamfélaginu
Eiríkur Valdimarsson: Kynlíf og gamla bændasamfélagið - er eitthvað fyndið við það?

18:00 Mótttaka á Rannsóknarsetri HÍ á Ströndum - Þjóðfræðistofa, Hnyðja í Þróunarsetrinu á Hólmavík

19:00 Hlaðborð á Café Riis
Glæsilegt hlaðborð á Café Riis, verð 3000 kr. Best er að panta í hlaðborðið í síma: 451-3567

20:30 Skemmtidagskrá á Riis

Pub Quiz um gleði og gamanmál
Villi Vandræðaskáld skemmtir mannskapnum
Pétur Húni: Pseudo - þjóðfræðilegt laumuhúmorískt atriði
Rachel Schollaert með uppistand
Alice Bower fyndnasti háskólaneminn: Tröllið tjáir sig

Dans, gleði og gaman fram eftir nóttu!

Samstarfsaðilar um Húmorsþing á Hólmavík 2018 eru Þjóðfræði við Háskóla ÍslandsRannsóknasetur HÍ á Ströndum - Þjóðfræðistofa, Fjölmóður - fróðskaparfélag á Ströndum, Félag þjóðfræðinga á Íslandi og Þjóðbrók, félag þjóðfræðinema.

Auglýst er eftir forstöðumanni Rannsóknaseturs HÍ á Austurlandi

Stofnun rannsóknasetra Háskóla Íslands auglýsir til umsóknar starf forstöðumanns Rannsóknaseturs Háskóla Íslands á Austurlandi, sem jafnframt er starf sérfræðings.

Stofnun Rannsóknasetra Háskóla Íslands hyggst koma að nýju á fót Rannsóknasetri Háskóla Íslands á Austurlandi sem starfaði þar á árunum 2008 til 2010. Frá haustinu 2014 hefur akademískur sérfræðingur á vegum stofnunarinnar haft aðsetur og unnið sínar rannsóknir á Austurlandi.

Rannsóknasetri Háskóla Íslands á Austurlandi er ætlað að sinna rannsóknum á breiðu sviði með áherslu á tengsl manns og náttúru. Auk sjálfstæðra akademískra rannsókna hefur forstöðumaður umsjón með starfsemi setursins, fjármálum þess og daglegum rekstri. Hann skipuleggur rannsóknir og samstarfsverkefni, hefur með höndum áætlanagerð og stýrir sókn í sjóði. Hann þarf að geta tekið að sér leiðbeiningu háskólanema í framhaldsnámi og aðra kennslu á háskólastigi.

Innan Stofnunar rannsóknasetra Háskóla Íslands eru 9 sjálfstæð rannsóknasetur víða um land. Rannsóknir eru meginviðfangsefni rannsóknasetranna, og eru viðfangsefnin fjölbreytt og tengjast nærumhverfi setranna með einhverjum hætti. Lögð er rík áhersla á árangur í starfi, áhrif og gæði rannsókna og hagnýtingu rannsóknaniðurstaðna. Þá er stofnunin jafnframt vettvangur samstarfsverkefna háskólans við sveitarfélög, stofnanir, fyrirtæki, félagasamtök og einstaklinga á landsbyggðinni.

Umsækjendur skulu hafa lokið doktorsprófi á sviði umhverfisfræða, t.d. í umhverfissagnfræði eða skyldum greinum og hafa stundað sjálfstæðar rannsóknir á því sviði. Frumkvæði og sjálfstæði í vinnubrögðum, lipurð í mannlegum samskiptum, gott vald á ensku og íslensku er nauðsyn. Reynsla af alþjóðasamstarfi sem og reynsla af þverfræðilegu samstarfi er æskileg. Þá er reynsla af sókn í innlenda sem erlenda rannsóknasjóði kostur. Umsækjendur skulu leggja fram rannsóknaáætlun til fimm ára þar sem skal koma fram hvernig rannsóknir umsækjanda tengjast Austurlandi.

Forstöðumaðurinn verður starfsmaður Háskóla Íslands en hefur starfsaðstöðu við Rannsóknasetur Háskóla Íslands á Austurlandi. Starfsstöð setursins er á Egilsstöðum og er gert ráð fyrir að forstöðumaðurinn gegni starfi sínu þaðan. Búseta á svæðinu er skilyrði. Um fullt starf er að ræða og verður ráðið í starfið til fimm ára með möguleika á ótímabundinni ráðningu að þeim tíma liðnum, sbr. 3. mgr. 31. gr. reglna fyrir Háskóla Íslands nr. 569/2009. Æskilegt er að viðkomandi geti hafið störf sem fyrst.

Um meðferð umsókna, mat á hæfi umsækjenda og ráðningu í starfið er farið eftir ákvæðum laga um Háskóla nr. 85/2008 og reglna um Háskóla Íslands nr. 569/2009. Sérstök nefnd sem rektor skipar annast mat og forgangsröðun umsókna.

Umsóknarfrestur er til 30. apríl 2018.

Sótt er um starfið á vefsíðu Háskóla Íslands undir laus störf.

Umsækjendur skulu láta rannsóknaáætlun til fimm ára fylgja umsókn sinni, vottorð um námsferil sinn og störf, ritaskrá, skýrslu um vísindastörf og önnur störf sem þeir hafa unnið. Í umsókn skal koma fram hver ritverka sinna, allt að átta talsins, umsækjandi telur veigamest með tilliti til þess starfs sem um ræðir. Umsækjandi sendir eingöngu þessi ritverk sín með umsókn, eða vísar til þess hvar þau eru aðgengileg á rafrænu formi. Þegar fleiri en einn höfundur stendur að innsendu ritverki skulu umsækjendur gera grein fyrir framlagi sínu til verksins. Enn fremur er ætlast til þess að umsækjendur láti fylgja með umsagnir um kennslu- og stjórnunarstörf sín, eftir því sem við á. Umsókn og umsóknargögn sem ekki er skilað rafrænt skal skila í tvíriti til Vísinda- og nýsköpunarsviðs Háskóla Íslands, Sæmundargötu 2, 101 Reykjavík.

Allar nánari upplýsingar um starfið veitir Sæunn Stefánsdóttir, forstöðumaður Stofnunar Rannsóknasetra Háskóla Íslands í síma 525 4041, saeunnst@hi.is .

Öllum umsækjendum verður svarað og þeim tilkynnt um ráðstöfun starfsins þegar ákvörðun liggur fyrir. Umsóknir geta gilt í sex mánuði frá lokum umsóknarfrests.

Laun eru samkvæmt kjarasamningi fjármálaráðherra og Félags háskólakennara.

Við ráðningu í störf við Háskóla Íslands er tekið mið af jafnréttisáætlun Háskóla Íslands.

Vakin er athygli á málstefnu Háskóla Íslands.

Tímarit Háskóla Íslands 2018 er komið út

Tímarit Háskóla Íslands 2018 er komið út. Þar er að finna fjölbreyttar greinar um starfsemi háskólans um land allt. Í því má meðal annars vinna viðtal við Jón Jónsson, þjóðfræðing við Rannsóknasetur Háskóla Íslands á Ströndum - Þjóðfræðistofu, um fólk og birni á förum um landið. Þá er einnig rætt við Chörlu Basran, doktorsnema við Rannsóknasetur Háskóla Íslands á Húsavík, um rannsóknaverkefni hennar um hnúfubaka í veiðarfærum. Rannsókn á ferðavenjum og útgjöldum ferðamanna á völdum áfangastöðum um landið er umræðuefnið í viðtali við Lilju Rögnvaldsdóttur, verkefnisstjóra við Rannsóknasetur Háskóla Íslands á Húsavík. Þá er einnig fjallað um í Tímaritinu rannsókn Jukka Siltanen, meistaranema í umhverfis- og auðlindafræði, um efnahagslega leyndardóma Snæfellsjökuls. Þorvarður Árnason, forstöðumaður Rannsóknaseturs Háskóla Íslands á Hornafirði, var einn leiðbeinenda Jukka í verkefninu. 

Í tímaritinu er svo einnig að finna viðtal við Birnu Gunnarsdóttur, verkefnisstjóra við Stofnun rannsóknasetra Háskóla Íslands og á Nýsköpunar- og vísindasviði HÍ, um opin vísindi. 

Sjón er sögu ríkari. Tímaritið má finna hér. 

Þar sem rassinn hvílir: Þjóðfræði heimilisins

Þjóðfræðinemar við Háskóla Íslands í námskeiðinu Hagnýt þjóðfræði eru á Ströndum í námslotu í vikunni og ætla að halda málþing sem verður opið öllum sem áhuga hafa. Flutt verða sjö stutt og skemmtileg erindi og óhætt að segja að dagskráin sé bæði fjölbreytt og spennandi. Heimilið og heimilislíf frá þjóðfræðilegu sjónarhorni er þemað, en daglegt líf í samtíma og fortíð er sígilt umfjöllunar- og rannsóknarefni þjóðfræðinga.

Málþingið verður haldið á Restaurant Galdri á Galdrasýningunni á Hólmavík og stendur frá kl. 18-20 miðvikudaginn 28. febrúar. Hægt verður að kaupa veitingar á meðan. Rannsóknasetur HÍ á Ströndum – Þjóðfræðistofa, Strandagaldur, Þjóðfræði við Háskóla Íslands og Fjölmóður – fróðskaparfélag á Ströndum standa saman að viðburðinum. 

Eftirfarandi fyrirlestrar verða fluttir:

Agnes Jónsdóttir: „Hér er ró og hér er friður …“

Baðherbergið hefur verið mikilvægt rými innan veggja hins íslenska heimilis frá því að tími torfbæjanna rann sitt skeið. Þar sinna menn og konur frumþörfum sínum, en það er ekki það eina sem þau gera þar – hvað er það sem á sér stað innan þessara veggja og hvers vegna það svona mikið einkamál?

Dagný Davíðsdóttir: Ég var að hugs’um að far’úr buxum.

Vinsældir kósíkvölda hafa gjarnan dýpri tilgangi en einungis að seðja hungur í sælgæti og góða ræmu. Margir halda þau reglulega með ákveðnum siðum og venjum sem alltaf er farið eftir. Viðburðurinn á sér einnig tímaramma og staðsetningu ásamt nokkrum lykilhlutum sem gera þau að því sem þau eru. Fyrir mörgum er þetta mikilvægasti tími vikunnar.

Gunnar Óli Dagmararson: Þetta er herbergið mitt. Um einkarými heimilisins, tómstundir og iðju.

Í fyrirlestri mínum ætla ég að velta fyrir mér gildi þess að eiga sér einkarými og miða það við kenningar fræðimanna í þjóðfræði um heimilið, rými og hópa. Ég mun taka dæmi úr eigin lífi og koma af stað umræðu með gestum málþingsins um einkarými heimilisins.

Guðrún Gígja Jónsdóttir: Hver á að elda í kvöld?

Matarmenning er stór hluti að lífi okkar, en án matar væri lítið um líf. Eldhúsið er staðurinn þar sem galdrarnir fara fram og er það mismunandi eftir því hver eldar og fyrir hvern og af hvaða tilefni! Matur og viðburðir eru mjög tengdir líkt og matarboð þar sem oftast er boðið vinum og vandamönnum í mat inn á heimilinu.

Sigrún Sigvaldadóttir: Bækur á heimilum landsmanna

Íslenska þjóðin hefur ávallt verið talin mikil bókaþjóð. Bækur hafa verið stolt eigenda sinna og prýtt heimili þeirra í gegnum aldirnar. Það verður því áhugavert að skoða aðeins hverskonar bækur hafa verið til á heimilum og hvernig þær hafa oft á tíðum gagnast á margskonar hátt.

Dagrún Ósk Jónsdóttir: „Í herberginu hennar var opin gátt til helvítis“

Það er oft talað um að það sé reimt í húsum, við fáum einhverja ákveðna tilfinningu þegar við löbbum inn í þau, þeim fylgja allskonar minningar og sögur, sannar eða ekki, og allskonar draugar fortíðarinnar. Suma gesti viljum við alls ekki hafa heima hjá okkur og getur verið erfitt að losna við. Hvernig bregst maður við ósýnilegri innrás á heimilið sem á að vera okkar griðarstaður?

Alice Bower: „Í hömrum þessum var hellir hennar, þar fór hún inn með hann“: Um heimilis- og matarhætti trölla, huldufólks og dverga

Oft er sagt að fólk geri hús að heimili. En sköpun heimilis getur líka átt sér stað í þúfum, í hellum og í dvergasteinum. Þar búa þjóðsagnaverur sem elda, halda matarboð, sofa -ekki ósjaldan hjá mennskum mönnum- og skemmta sér um kvöldið með vín og vist og hljóðfæraslátt. Í erindinu verður lagt út af völdum dæmum úr íslenskum þjóðsagnasöfnum til að draga fram einkenni heimilishátta trölla, álfa og dverga. Einnig verður grafist fyrir um samband þessara lýsinga og viðhorfa sagnamanna til náttúrunnar.

Verið öll hjartanlega velkomin! Aðgangur að málþinginu er ókeypis.

Áramótakveðja Stofnunar rannsóknasetra Háskóla Íslands

Starfsfólk Stofnunar rannsóknasetra Háskóla Íslands þakkar samfylgdina á árinu sem er að líða og óskar samstarfsfólki sínu gleðilegs nýs árs.

Árið 2018 verður 18. starfsár stofnunarinnar og eins og áður margt spennandi framundan. Ársfundur stofnunarinnar verður t.a.m. haldinn í Bolungarvík, 11. apríl nk. Takið daginn frá!

Vinnusmiðja: Sögur að norðan

Síðustu daga hafa Salvör Aradóttir og Ólafur Hrafn Júlíusson frá verkefninu Stafrænar sögur hjá ReykjavíkurAkademíunni verið á Hólmavík með vinnusmiðju fyrir ungt fólk. Smiðjan er hluti af samnorrænu verkefni sem heitir Sögur að norðan (e. Stories from the North). Grunnskólinn á Hólmavík og Rannsóknasetur HÍ á Ströndum - Þjóðfræðistofa eru samstarfsaðilar þeirra í verkefninu, sem snýst um stafræna miðlun sagna ungs fólks á norðurslóðum. Ungmenni í elstu deild grunnskólans hafa tekið þátt í vinnusmiðjunni með Salvöru og Ólafi, ásamt kennara sínum Esther Ösp Valdimarsdóttur mannfræðingi. Afraksturinn var svo sýndur í skólanum í dag við mikinn fögnuð. Gestunum var jafnframt þakkað fyrir lærdómsríkt, skemmilegt og skapandi verkefni og samstarf. 

Sögur að norðan - opin kynning í Hnyðju

Opin kynning á verkefninu Sögur að norðan (e.Stories from the North), verður haldin í Hnyðju, Þróunarsetrinu á Hólmavík þriðjudaginn 21. nóvember kl. 18. Sögur að norðan er norrænt samstarfsverkefni sem Grunnskólinn á Hólmavík og Rannsóknasetur HÍ á Ströndum - Þjóðfræðistofa taka þátt í. Það snýst um stafræna miðlun sagna ungs fólks á norðurslóðum. 

Á kynningunni í Hnyðju, sem er opin öllum sem áhuga hafa, munu Salvör Aradóttir og Ólafur Hrafn Júlíusson frá verkefninu Stafrænar sögur hjá ReykjavíkurAkademíunni kynna aðferð stafrænna sagna og sýna dæmi um stafrænar sögur. Einnig verður verkefnið Sögur að norðan kynnt vel og vandlega.

Viðburðurinn tekur um það bil klukkustund.

Alvöru karlmenn! í Háskóla Íslands

Sýningaropnun í Háskóla Íslands: Sæbjörg Freyja Gísladóttir þjóðfræðingur á Flateyri opnar ljósmyndasýninguna Alvöru karlmenn miðvikudaginn 8. nóvember 2017. Kynning á sýningunni verður kl. 16 á opnunardegi í stofu 102 í Gimli og síðan sér Sæbjörg um leiðsögn um sýninguna á göngum Háskólatorgs. Þaðan liggur svo leiðin í Stúdentakjallarann. Sýningin er á vegum Námsbrautar í þjóðfræði og safnafræði við Háskóla Íslands og Rannsóknarseturs HÍ á Ströndum - Þjóðfræðistofu. Verið öll hjartanlega velkomin! 

Alvöru karlmenn

Vaskir sjómenn, vígreifir bankamenn, krúttleg lopatröll, léttfættir séntilmenn, þrekmiklir bændasynir: Það er misjafnt hvað þykir karlmannlegt, breytilegt eftir stað, stund og stétt. En hvernig hefur karlmennskan þróast í tímans rás og hvernig bera menn sig karlmannlega í dag? Þjóðfræðingurinn Sæbjörg Freyja Gísladóttir hefur rannsakað hvernig karlmennska birtist í ljósmyndum frá árunum 1914 til 2014, hvaða líkamsstaða þykir karlmannleg á hverjum tíma og hvernig líkamar karlmanna endurspegla samfélagsbreytingar.

Sæbjörg safnaði og greindi um eitt þúsund ljósmyndir frá Skjalasafni Austfirðinga og Skjalasafninu á Ísafirði frá fyrstu áratugum 20. aldar. Hún ljósmyndaði einnig þrjátíu karlmenn sem eru búsettir á Egilsstöðum, Reykjavík og Önundarfirði. Afrakstur þessa er ljósmyndasýningin Alvöru karlmenn sem þegar hefur verið sýnd víða um land og ratar nú á veggi Háskóla Íslands. 

 

Starfsfólk rannsóknasetra á Þjóðarspegli

Þjóðarspegillinn, um rannsóknir í félagsvísindum, fer fram föstudaginn nk. 3. nóvember milli 9 og 17 í Háskóla Íslands. Rannsóknasetur háskólans eiga sína fulltrúa á Þjóðarspeglinum þetta árið eins og oft áður.

Jón Jónsson, verkefnisstjóri Rannsóknaseturs Háskóla Íslands á Ströndum - Þjóðfræðistofu, tekur þátt í málstofunni Náttúruhvörf og ímyndaflakk á norðurslóð: Samskipti mannfólks, dýra og náttúruvætta sem fram fer í Aðalbyggingu Háskóla Íslands, stofu 220, milli 11 og 12.45. Mun hann þar flytja erindið Kynjasögur um hvítabirni.

Lilja B. Rögnvaldsdóttir, verkefnisstjóri við Rannsóknasetur Háskóla Íslands á Húsavík tekur þátt í málstofunni Ferðaþjónusta í byggðum landsins: Viðhorf og innsýn I, sem fram fer kl. 13 - 14.45 í Lögbergi 102. Mun hún þar flytja fyrirlestur sinn, Erlendir gestir á einstökum svæðum.

Nánar má lesa um dagskrá Þjóðarspegilsins hér. 

Pages

Þú ert að nota: brimir.rhi.hi.is