Vísindamenn rannsóknasetra Háskóla Íslands taka þátt í Arctic Circle

Ráðstefnan Arctic Circle hefst formlega nk. föstudag og stendur fram á sunnudag. Þó nokkrir viðburðir eru þó á dagskrá hennar fyrir formlega setningu og á morgun, 12. október kl. 17.30 í Rímu, mun Marianne Rasmussen, forstöðumaður Rannsóknaseturs Háskóla Íslands á Húsavík taka þátt í málstofunni Arctic Climate Predictions: Pathways to Resilient, Sustainable Societies (ARCPATH). Er málstofan skipulögð af Háskóla Íslands, Háskólanum í Bergen og Stofnun Vilhjálms Stefánssonar. Mun Marianne flytja erindið "Climate, Cetaceans and Tourism and Anthropogenic Noise."

ARCPATH er norrænt öndvegisverkefni sem fjármagnað er af NordForsk.  ARCPATH er stefnt að eftirfarandi niðurstöðum: að ná fram betri spám um loftslag heimskautasvæða með því að fækka óvissuþáttum sem rekja má til breytinga í hafinu, að öðlast innsýn í næmi heimskautaloftslags gagnvart umhverfisbreytingum af mannavöldum, einnig að auka skilning á því hvernig loftslagsbreytingar orka á margvíslega félagslega þætti, allt frá þróun fiskveiðisamfélaga til nýtingar og neyslu sjávarspendýra í Norður-Atlantshafi. Í ARCPATH verða notuð tæki og nálgun bæði úr náttúruvísindum og félagsvísindum til þess að skapa þverfaglegt verkefni sem mun tengja saman loftslagsspár og áhrif á mannlíf, með greiningu og mati á þeim tækifærum og áhættu sem eru loftslagstengd.

Halldór Pálmar Halldórsson, forstöðumaður Rannsóknaseturs Háskóla Íslands á Suðurnesjum, mun flytja erindi í málstofunni The Arctic and Polar Research as a Vehicle for Stem & Environmental Education á laugardag 12. október nk. kl. 12.45 í Rímu. Í erindi hans "Educational Activities and Opportunities at the Sudurnes Science and Learning Center, SW Iceland" mun Halldór miðla af reynslu sinni í ýmis konar miðlunar- og kennsluverkefnum sem hann hefur tekið þátt í og komið á fót fyrir Rannsóknasetur HÍ á Suðurnesjum.

Dagskrá Arctic Circle ráðstefnunnar má finna hér.

 

Þú ert að nota: brimir.rhi.hi.is